Washington-i studion koston e blerjes së Groenlandës

Ky do të ishte hapi më konkret që Washington-i ka ndërmarrë deri më sot për ta kthyer në realitet dëshirën e presidentit Donald Trump për të fituar Groenlandën.

Sipas tre zyrtarëve të lartë me dijeni për këtë çështje, të cilët folën për The Washington Post në kushte anonimiteti, anëtarët e Zyrës së Buxhetit të Shtëpisë së Bardhë janë përpjekur javët e fundit të përcaktojnë koston e transformimit të ishullit autonom danez në një territor amerikan.

Hulumtimi përfshin koston e ofrimit të shërbimeve të qeverisë amerikane për 58 mijë groenlandezë, si dhe një vlerësim të të ardhurave që Thesari Amerikan mund të gjenerojë nga burimet natyrore të Groenlandës.

“Ne jemi duke diskutuar raportin kosto-përfitim për Shtetet e Bashkuara”, tha një zyrtar i lartë.

Një opsion që po eksplorohet është t’i ofrohet qeverisë së Groenlandës një marrëveshje më të favorshme se ajo e ofruar nga Danimarka, e cila aktualisht subvencionon shërbimet në ishull në shumën prej rreth 600 milionë dollarë në vit.

“Përfundimi është se ne do të paguajmë më shumë se Danimarka”, tha një nga burimet për të përditshmen Washington Post.

Një tjetër tha se në këtë kohë, “zyrtarët e buxhetit janë ende duke punuar për të përcaktuar koston” e blerjes, si dhe koston e “ruajtjes së Groenlandës si një territor i SHBA-ve”.

Ai vuri në dukje se analizat e këtyre shpenzimeve janë krijuar duke supozuar një votë pozitive të Groenlandës për pranim.

Ato po përgatiten për Russell Vought, drejtor i Zyrës së Menaxhimit dhe Buxhetit, nga stafi në Divizionin e Çështjeve Ndërkombëtare të zyrës.

Sipas Washington Post, një planifikim i tillë i brendshëm “sugjeron që ambiciet e administratës për të fituar Groenlandën shkojnë përtej mendimeve të presidentit” dhe “kanë filluar të reflektohen në politikën e qeverisë”.

Donald Trump ka thënë vazhdimisht se Shtetet e Bashkuara “do të marrin” Groenlandën. “100 për qind”, i tha ai NBC News të shtunën.

I pyetur nëse kjo blerje do të përfshinte përdorimin e forcës, ai tha se kishte “një shans të mirë që ta arrijmë këtë pa përdorimin e forcës ushtarake”, por se ai “nuk do të përjashtonte asgjë.”