Zbardhen raportimet sekrete: Irani po planifikon atentat ndaj presidentit sirian

Irani po bashkëpunon me elementë të tjerë armiqësorë për të organizuar atentatin ndaj presidentit të Sirisë, Ahmed al-Sharaa, paralajmërojnë burime të ushtrisë izraelite (IDF) për Walla News.

Sipas këtyre burimeve, paralajmërimi është dhënë së fundmi dhe vjen në një moment delikat, në sfondin e hapjes së kontakteve mes Izraelit dhe Sirisë, si dhe të rritjes së tensioneve rajonale.

Inteligjenca e sigurisë tregon se al-Sharaa përballet me kërcënime reale dhe ka qenë i detyruar të investojë ndjeshëm në masat për mbrojtjen personale dhe stabilizimin e regjimit të tij.

Sipas burimeve të Walla-s, muajt e fundit janë zhvilluar disa diskutime nën drejtimin e ministrit të Mbrojtjes, Israel Katz, me pjesëmarrjen e zyrtarëve të lartë të sigurisë.

Në përfundim të tyre, është vendosur që Izraeli të mos tërhiqet nga territori sirian dhe rajoni i Malit Hermon. Një burim i lartë i IDF-së konfirmon se drejtuesit ushtarakë mbështesin plotësisht këtë qëndrim.

Burimet e IDF-së bëjnë me dije se politika qeveritare izraelite e ndan aktivitetin në Siri në tre zona kryesore.

E para është zona e kontaktit përgjatë kufirit ndërkombëtar izraelito-sirian, ku trupat e IDF-së veprojnë për të garantuar mbrojtjen direkte të komuniteteve izraelite pranë kufirit dhe sigurinë më të thellë brenda territorit të Izraelit.

Zona e dytë është zona e sigurisë, e cila përfshin territor sirian deri në rreth 15 kilometra nga kufiri, ku ushtria izraelite synon të parandalojë hyrjen dhe vendosjen e elementëve terroristë, si edhe ngritjen e infrastrukturës së tyre.

Zona e tretë është ajo e ndikimit, që shtrihet nga Sweida në jug deri në periferinë e Damaskut dhe përkufizohet si një zonë e çmilitarizuar, ku Izraeli monitoron zhvillimet në terren me qëllim frenimin e depërtimit të forcave armiqësore, vendosjen e sistemeve të avancuara të armëve apo krijimin e bazave ushtarake.