Zbulohet plani i Serbisë/ Profesori zbardh prapaskenat

Kryetarja e Komisionit Evropian, Ursula von der Leyen, ka vazhduar vizitën e saj në Beograd, dhe pas takimit me presidentin serb, Aleksandër Vuçic ka ripërsëritur qëndrimin se njohja “de fakto” e pavarësisë së Kosovës, nënkupton zbatimin e marrëveshjes së rënë dakord në Ohër.

Në lidhje me këtë temë ka folur edhe profesori universitar Dr. Enver Bytyçi. Ai u shpreh zhvillimet e fundit kanë filluar të marrin kahje të ndryshme dhe për këtë ka ndikuar suksesi i policisë së Kosovës më 24 shtator por edhe theksoi që deklaratat e Aleksandër Vuçiç ishin në kundërshtim me rekomandimet e BE-së dhe se ai nuk e pranon Kosovën shtet të pavarur, sepse është në fushatë zgjedhore.

Megjithatë, presidenti i Serbisë nuk e pranoi as në Bruksel, as gjatë vizitës së zonjës Ursula von der Leyen obligimin për njohjen faktike të pavarësisë së Kosovës. Ai vazhdon të justifikohet se “nuk mund ta shkelë kushtetutën e vendit të tij”! Deklaratat e Aleksandër Vuçiç janë krejtësisht në kundërshtim me rekomandimet e BE-së. Ai nuk e pranon Kosovën shtet të pavarur, sepse është në fushatë zgjedhore. Por nuk e pranon edhe për faktin se nuk dëshiron që të ketë një asosacion për komunat me shumicë serbe me një status që nuk çon në ndarjen e Kosovës. Kur thotë qe “nëse njoh Kosovën e pavarur dhe pranoj anëtarësimin e saj në OKB, atëherë shkel kushtetutën e Serbisë”, në thelb Vuçiç shpreh hapur synimet e tij për ndarjen e katër komunave të veriut dhe bashkimin e tyre me Serbinë” – potencoi Bytyçi

Ai gjithashtu shpjegoi që pas zgjedhjeve, nëse presioni i Perendimit nuk do të rritet do të ketë euro-amerikanë që do ta mbështesin.

“Zgjedhjet parlamentare në Serbi, po përdoren si alibi e qeverisë dhe presidentit serb. Alibia është e tillë: – Ne kemi zgjedhje dhe në kohë zgjedhjesh nuk mund të bëjmë kompromise për njohjen de facto të Kosovës si shtet të pavarur. Por në të vërtetë ata duan të fitojnë kohë. Mendojnë se ndoshta ndryshojnë balancat në favor të Serbisë e të Rusisë dhe më pas të munden të diktojnë zgjidhjen që ata duan vetë, bazuar ne konceptin e “Botës Serbe”! Këtë taktikë e ka përdorur Serbia vazhdimisht në dy dekadat e fundit.

Për shkak të Kosovës dhe me qëllim që t’i ikin bisedimeve dhe nënshkrimit të marrëveshjeve me Kosovën e për Kosovën, ata kanë likuiduar fizikisht një kryeministër dhe kanë shpallur gjithmonë zgjedhje të parakohshme. Vetë Vuçiç në 12 vitet e fundit e ka përdorur këtë taktikë së paku tri here” –  tregoi Bytyçi, sipas te cilit, “Vetëm pasi të jepen të gjitha garancitë juridike ndërkombëtare për Kosovën nga ana e Serbisë mund të nënshkruhet marrëveshja për asosacionin.”

Sipas profesorit, Serbia do të mundohet të destabilizoj ende Kosovën me akte të ndryshme dhe për këtë arsye Qeveria Kurti nuk duhet të pranoj të nënshkruaj asociacionin pa pasur edhe njohje faktike të Kosovës.