ZBULOHET STRATEGJIA KURTH/ Ja kush është plani Putin-Vuçiç

Kryetarja e Komitetit të Helsinkit për të drejtat e njeriut në Serbi, Sonja Biserko, nuk pret marrëveshje mes Kosovës dhe Serbisë pa prezencën e Shteteve të Bashkuara të Amerikës.

Në diskutimin me temën “E ardhmja e dialogut ndërmjet Kosovës dhe Serbisë: Mundësitë për dinamika të reja dhe ndikimi i zgjedhjeve në BE dhe SHBA” Biserko ka porositur Bashkimin Evropian të ketë qasje ndryshe ndaj Serbisë.

“Deri tani kjo qasje ka qenë shumë paqësore dhe nuk po shoh ndonjë ndryshim persa i përket integrimit në BE”, ka thënë Biserko.

Sipas saj, komuniteti serb në veri është lënë me besimin që ndarja është e mundur, prandaj “është e vështirë t’u qasesh tani”.

Biserko ka thënë se shoqëria civile duhet të mendojë për një strategji që gradualisht t’i afrohet komunitetit serb me qëllim që ta ndajë nga Serbia.

“Duhet të ketë një fond ndërkombëtar ndoshta që do të ishte një instrument për të tërhequr integrimin e komunitetit serb në Kosovë dhe hapjen e mundësive ekonomike me qëllimin e shkëputjes së varjes së tyre nga Beogradi”, ka deklaruar Biserko, duke theksuar se dialogu mes Kosovës dhe Serbisë duhet të sillet në një nivel te tille ku nuk do të ketë ndarje etnike.

“Unë do ta kundërshtoja argumentin e Serbisë që ka prioritet Asociacionin në dialog. Ndasia etnike ka dëshmuar mosfunksionalitet në Bosnje. Kjo duhet të sillet në një nivel që te mos ketë ndarje etnike”- ka shtuar Biserko

Sonja Biserko, kryetare e Komitetit të Helsinkit për të drejtat e njeriut në Serbi, ka deklaruar se presidenti serb, Aleksandar Vuçiq, po e përdor si strategji shtyrjen e zbatimit të marrëveshjeve me Kosovën, me qëllim që sipas saj, të ndryshojë konteksti gjeopolitik në botë.

Ajo ka deklaruar se Perëndimi e ka intensifikuar presionin per situatën mes Kosovës dhe Serbisë, në mënyrë që proceset të finalizohen dhe të hiqen shqetësimet për sigurinë e Ballkanit.

“Kjo është strategjia e pritjes dhe shtyrjes së vendimmarrjes në raport me Kosovën. Por gjërat janë intensifikuar nga ana e Perëndimit dhe shpresoj që do të intensifikohen edhe më shumë në muajt e ardhshëm për të finalizuar apo përmbyllur shqetësimet për sigurinë në Ballkan. Sepse kjo është gjëja kryesore për Perëndimin pas ngjarjes se Banjskës sepse ajo ishte ilustrim se çfarë mund të ndodhë në rajon nëse Beogradi vazhdon me këto politika dhe dukshëm Rusia ka interes për ta mbajtur statu-quo-në në rajon, ashtu siç është edhe një argument shtesë për regresin në rajonin tonë në 12 vitet e kaluara”, ka theksuar Biserko duke shtuar se i dërguari i Bashkimit Evropian për dialogun, Miroslav Lajçak nuk ka qene nje autoritet bindës për palët e as “s’kishte energji”.

Për Biserkon, Lajçaku ishte ndërmjetës në një proces ku Kosova e Serbia nuk dialoguan.

“Palët kane udhetuar në Bruksel dhe nuk jane takuar por kane patur kontakte të ndarë kryesisht me BE-në. Nuk ka se çfarë të ndodhë me dialogun më tutje sepse ka marrëveshje që duhet zbatuar” – është shprehur Biserko e cila gjithashtu ka potencuar se Qeveria e Kosovës duhet “t’i përvetësojë marreveshjet dhe marredheniet me serbet e veriut me empati dhe me një kornizë të re, që do ti hapte rrugën perspektivës së integrimit ekonomik.

Ajo ka thënë se kjo do jete e vështirë për shkak të përçarjes së shkaktuar nga Lista Serbe dhe Beogradi.

“Kështu që mendoj se ka shumë sfida për Kosovën, për qeverinë e Kosovës, për shoqërinë kosovare në tërësi për sa i përket integrimit të komunitetit serb”, ka theksuar Biserko.