Zgjatet deri në fund të vitit gjendja e emergjencës nga energjia

Qeveria ka vendosur që të zgjasë gjendjen e emergjencës në furnizimin me energji elektrike, deri më 31 dhjetor të vitit 2023. Vendimi u mor sot në mbledhjen e Këshillit të Ministrave, ku u vendos që emergjenca të shtyhet deri në 31 dhjetor, ndërkohë që ishte deri në 30 qershor.

Emergjenca për energjinë elektrike është shtyrë disa herë nga Këshilli i Ministrave.

Vendimi

NJË NDRYSHIM NË VENDIMIN NR.584, DATË 8.10.2021, TË KËSHILLIT TË MINISTRAVE, “PËR SHPALLJEN E GJENDJES SË EMERGJENCËS NË FURNIZIMIN ME ENERGJI ELEKTRIKE”, TË NDRYSHUAR.

Në mbështetje të nenit 100 të Kushtetutës dhe të shkronjës “ç”, të pikës 1, të nenit 90, të ligjit nr.43/2015, “Për sektorin e energjisë elektrike”, të ndryshuar, me propozimin e Zëvendeskryeministrit dhe ministër i Infrastrukturës dhe Energjisë, Këshilli i Ministrave

V E N D O S I:

Në pikën 5, të vendimit nr.584, datë 8.10.2021, të Këshillit të Ministrave, “Për shpalljen e gjendjes së emergjencës në furnizimin me energji elektrike”, të ndryshuar, fjalët “… 30 qershor 2023.” zëvendësohen me “… 31 dhjetor 2023.”. Ky vendim hyn në fuqi menjëherë dhe botohet në “Fletoren zyrtare.