Zyrtare, zbardhet operacioni kibernetik kundra faqeve të iranianëve që sulmuan dhe Shqipërinë

Specialistë të krimit kibernetik nga Gjermania, Shtetet e Bashkuara dhe Kanadaja kanë çmontuar dy nga botnet-et më të mëdha në botë, të njohura si Aisuru dhe Kimwolf, të cilat dyshohet se qëndronin pas sulmeve të mëdha online.

Autoritetet njoftuan të premten se këto dy rrjete të mëdha të pajisjeve të infektuara u mbyllën në kuadër të një operacioni të gjerë ndërkombëtar. Sipas tyre, Aisuru dhe Kimwolf përbënin një kërcënim serioz për infrastrukturën e teknologjisë së informacionit, për shkak të madhësisë dhe kapaciteteve të tyre për të kryer sulme.

Një botnet është një rrjet kompjuterësh ose pajisjesh të lidhura në internet, të cilat janë infektuar me programe keqdashëse dhe kontrollohen në mënyrë të fshehtë nga një operator. Këto rrjete përdoren për aktivitete të paligjshme, si sulme kibernetike ose vjedhje të dhënash.

Sipas autoriteteve, Aisuru përbëhej nga disa milionë pajisje të komprometuara, përfshirë ruterë dhe kamera web. Ndërkohë, botnet-i Kimwolf përfshinte gjithashtu disa milionë pajisje të infektuara, kryesisht pajisje Android TV.

Dy persona të dyshuar si administratorë të këtyre rrjeteve janë identifikuar dhe pritet të përballen me pasoja ligjore, megjithëse nuk janë dhënë detaje të mëtejshme.

Këto botnet-e janë përdorur për të kryer sulme të njohura si “sulme të shpërndara të mohimit të shërbimit” (DDoS), ku serverët ose sistemet përmbyten me trafik të madh për t’i ngadalësuar ose për t’i nxjerrë jashtë funksionit. Sipas Departamentit të Drejtësisë të SHBA-së, disa prej këtyre sulmeve kanë qenë rekordthyese.

Pajisjet e infektuara kontrolloheshin plotësisht nga operatorët e botnet-eve, të cilët më pas ua shisnin aksesin kriminelëve të tjerë kibernetikë. Këta të fundit shpesh i përdornin për të shantazhuar viktimat, duke u shkaktuar në disa raste humbje që arrinin në dhjetëra mijëra dollarë.

Ndërkohë, disa ditë më parë, edhe Administrata e Kuvendit është përballur me një sulm kibernetik ndaj sistemit të saj IT. Si pasojë, deputetët dhe stafi nuk kanë pasur akses në kompjuterët dhe adresat e tyre elektronike, raporton Euronews.com.

E-mailet e tyre janë publikuar në kanalin e grupit të hakerëve “Homeland Justice” në Telegram, ku thuhej:

“Të gjitha bisedat dhe korrespondenca e anëtarëve të korruptuar të Kuvendit gjatë muajve të fundit janë në duart tona. Ne jemi shumë më afër jush sesa mendoni. A i keni strehuar vërtet ata vrasës dhe vrasës fëmijësh? Do të sigurohemi që kjo turp të mbetet me ju përgjithmonë.”

Përveç publikimit në Telegram, disa deputetë kanë marrë edhe email-e kërcënuese nga burime të jashtme. Ata janë paralajmëruar të mos hapin lidhje (linke) apo skedarë të bashkëngjitur, për të shmangur rreziqe të mëtejshme për sigurinë e sistemit.

Sipas burimeve nga Kuvendi, deri tani nuk ka prova për transferim të të dhënave si pasojë e sulmit, por një vlerësim përfundimtar pritet të bëhet nga ekspertët e sigurisë kibernetike.