Alarm për rikthimin e Trumpit dhe Grenell/ Eksperti nga Brukseli tregon se çfarë do ndodhë me Kosovën

Presidenti amerikan Joe Biden njoftoi më 21 korrik se do të tërhiqet nga gara zgjedhore e 5 nëntorit. Presioni nga Partia e tij Demokratike për t’u tërhequr, u rrit pas një performance jo të mirë të Bidenit në një debat presidencial me kundërkandidatin republikan, Donald Trump.

Gjithë këto zhvillime shkaktuan reagime të mëdha, pasi një rikthimi i Donald Trumpit në pushtet është i mundshëm dhe si i tillë nuk do të ishte zhvillim pozitiv për Kosovën.

Në lidhje me tërheqjen e Bidenit nga gara presidenciale dhe rikthimin e mundshëm të Trumpit në pushtet, foli bashkëpunëtori i Këshillit për Politikat e Demokratizimit në Bruksel, Toby Vogel.

Ai tha se janë tre skenarë kryesorë që mund të ndodhin në kuadër të zgjedhjeve në SHBA dhe u shpreh i shqetësuar nëse Trump fiton zgjedhjet, pasi tha se nuk do ishte lajm i mirë për Kosovën. Madje, eksperti nga Brukseli parashikoi mundësinë që Trump t’i japë një rol të rëndësishëm Grenellit, duke bere qe te rikthehej rreziku për planin e “shkëmbimeve të territoreve”.

“Trump 2” do të ishte shumë i keq për Evropën dhe Ballkanin Perëndimor në përgjithësi, por edhe për Kosovën në veçanti. Është e mundur që Trump do t’i japë Richard Grenellit një rol të lartë në administratën e tij – ndoshta Sekretar i Shtetit – dhe plani i ashtuquajtur “shkëmbim i territoreve” do të ishte përsëri në axhendë. Ndryshe nga hera e kaluar, ne nuk kemi një Merkel në Evropë që ta ndalojë këtë zhvillim, kështu që mund të bëhet shumë e shëmtuar ajo qe do ndodhe neser. Edhe lidhjet tregtare të familjes Trump dhe Grenell me Serbinë janë gjithashtu shumë shqetësuese dhe do të çimentonin më tej prirjet e tyre pro-serbe” –  nënvizoi Toby Vogel.

Më tej, eksperti nga Brukseli u shpreh se nuk ishte shumë i kënaqur as me qasjen e administratës Biden ndaj zhvillimeve në Ballkan, teksa përmendi edhe fuqizimin e Vucicit dhe Edi Ramës.

“Ambasadori Hill e ka bërë shumë të qartë se administrata amerikane dëshiron të qetësojë rajonin – ta mbajë atë të qetë – duke fuqizuar të fortët vendas, veçanërisht Vuçicin dhe Ramën. BE-ja është në të njëjtën gjatësi vale” – potencoi Toby Vogel