Asociacioni është grackë

Deputeti i Lëvizjes Vetëvendosje, njëherësh kryetar i Komisionit për Punë të Jashtme, Haki Abazi, ka folur për dinamizimin e dialogut, marrëveshjen finale Kosovë-Serbi dhe presionin ndërkombëtar për formimin e Asociacionit të komunave me shumicë serbe.

Abazi ka thënë se rikthimi i çështjes së Asociacionit është grackë në të cilën ka rënë ekipi negociues i Kosovës, por edhe BE-ja. Sipas tij, Asociacioni dhe tensionet e krijuara herë pas here në veri po përdoren si hapësirë në të cilën manovron presidenti serb, Aleksandar Vuçiç për të mos bërë reforma të sistemit të sigurisë dhe drejtësisë në Serbi.

Përsa i përket dialogut deputeti i Lëvizjes Vetëvendosje tha se ka dinamizim të këtij procesi, por se nuk pret të ketë marrëveshje të shpejtë me Serbinë pasi, siç tha, Kosova është e ngufatur nga çështja e Asociacionit dhe se kjo është padrejtësia më e madhe që i është bërë që nga shpallja e pavarësisë në vitin 2008. Sipas tij, Beogradi do të vazhdojë përpjekjet për ta mbajtur dialogun në status quo.