Banori i Bërxullës: Rama hedh paratë në Arbitrazh, shkatërron imazhin e vendit

Gjatë protestës së Bërxullës banorët e kësaj zonë janë shprehur të indinjuar, teksa kanë komentuar edhe humbjen e Shqipërisë në Arbitrazhin e Bankës Botërore ndaj investitorit italian Francesco Becchetti.

Sipas tyre shteti po sekuestron pronat e tyre për t’i kthyer në para që të paguhet shifra prej 110 milionë eurosh që shteti shqiptar i detyrohet Becchettit.

Një tjetër prej protestuesve u shpreh se kryemnistri në vend që paratë t’ia japë qytetarëve të tij, po ia jep Becchettit dhe po prish imazhin e Shqipërisë duke kërcënuar me daljen nga juridiksioni i Arbitrazhit të Bankës Botërore.

“Shteti bën sekuestrimin e pronës sonë, e kthen në lekë se do e marri ai Becchetti që fitoi gjyqin, 110 milionë euro. Çfarë të presim ne nga qeveria, kjo është babëzi”, u shpreh një tjetër banor i indinjuar.

“Spiunët e partisë në pushtet, gjithë natën nuk i ka zënë gjumi mbrëmë për këtë protestë sot, si e si ta përçajnë, do jemi fitimtarë. Do jemi fitimtarë sepse jemi në pronat tona, kurrë nuk do mposhtemi. Zoti ia theftë qafën këtij pushtetari që nuk mendon për ne dhe hedh paratë në Arbitrazh. Pse të mos ia japë popullit ato para, por shkon të shkatërrojë imazhin e Shqipërisë në gjithë botën. Ti nuk po i lë gjë më të zezë pa i bërë këtij populli. Mjerë për ato që i shkojnë mbrapa atij të ziu”, u shpreh një prej protestuesve.