BBC përballet me akuza për “fake news”, presidenti amerikan paralajmëron padi

Donald Trump i ka dërguar një letër transmetuesit publik në Mbretërinë e Bashkuar, BBC, duke kërcënuar me veprime ligjore, pas polemikave që shpërthyen për shkak të redaktimit të një fjalimi të presidentit amerikan, në një dokumentar të emisionit investigativ Panorama.

Kritikët thanë se versioni i transmetuar nga Panorama ishte tjetërsuar dhe mashtrues, pasi ishte hequr pjesa ku Trump u bënte thirrje mbështetësve të tij të protestonin paqësisht.

Një zëdhënës i BBC-së tha: “Do ta shqyrtojmë letrën dhe do t’i përgjigjemi drejtpërdrejt në kohën e duhur.”

Kryetari i BBC-së, Samir Shah, më herët kishte deklaruar se korporata kishte marrë komunikim nga Trump në lidhje me mënyrën se si ishte redaktuar dokumentari — i transmetuar një javë para zgjedhjeve të vitit të kaluar në SHBA — por nuk e kishte konfirmuar nëse presidenti kishte kërcënuar konkretisht me padi.

Ai tha: “Aktualisht po shqyrtojmë si t’i përgjigjemi.”

Trump ka një histori të gjatë padish ndaj mediave amerikane. Ai më parë kishte arritur një marrëveshje jashtë gjykate me ABC News, pasi moderatori George Stephanopoulos kishte deklaruar gabimisht se ai ishte “shpallur fajtor për përdhunim”.

Gjithashtu, Trump kishte zgjidhur një mosmarrëveshje ligjore me CBS News në lidhje me një intervistë të transmetuar në programin 60 Minutes me Kamala Harris.

Aktualisht, ai është në procese gjyqësore me The New York Times dhe The Wall Street Journal.

Trump ka ndërmarrë gjithashtu veprime kundër agjencisë Associated Press, pasi ajo kishte refuzuar të përdorte emrin që ai preferon për Gjirin e Meksikës: Gulf of America (Gjiri i Amerikës).