BBVIP/ Familja e Brikenës reagojnë publikisht pas versionit të Mateos

Pas deklaratave të Mateos që hodhën dritë mbi versionin e tij të ndarjes me Brikenën, të afërmit e saj kanë reaguar publikisht me një qëndrim të strukturuar dhe të prerë, duke kërkuar respekt për privatësinë dhe kufijtë personalë.
Në reagimin e publikuar, familja e Brikenës thekson se fjala e dhënë nuk është temë loje dhe se çështjet personale nuk duhet të përdoren për strategji apo përfitim publik.
“Ndjejmë përgjegjësi të sqarojmë një parim të thjeshtë: fjala e dhënë nuk është temë loje dhe çështjet e jetës personale nuk përdoren për strategji apo përfitim publik,” thuhet në deklaratë.
Sipas tyre, kur dy persona bien dakord që e kaluara të mos diskutohet publikisht, kjo marrëveshje duhet të respektohet, pavarësisht rrethanave apo kontekstit ku ndodhen.
“Kur dy persona bien dakord që e kaluara të mos diskutohet, ajo marrëveshje duhet të respektohet, pavarësisht rrethanave të lojës,” vijon reagimi, duke nënvizuar se vendimet e mëvonshme janë pasojë e thyerjes së këtij parimi dhe jo e emocioneve apo interesave momentale.
Familja ndalet edhe te koncepti i të qenit figurë publike, duke bërë një dallim të qartë mes transparencës dhe cenimit të privatësisë.
“Të qenit figurë publike nënkupton përgjegjësi dhe transparencë në atë që është publike, por nuk e shfuqizon të drejtën për privatësi dhe as nuk e justifikon hapjen e detajeve personale që nuk i shërbejnë askujt. E kaluara private nuk është material loje,” theksohet më tej.
Në deklaratë sqarohet gjithashtu se reagimi nuk synon sulmin ndaj askujt dhe as hapjen e detajeve të reja, por mbrojtjen e dinjitetit dhe privatësisë.
“Ne zgjedhim të mos hyjmë në detaje dhe as të drejtojmë gishtin. Qëndrimi ynë është mbrojtje e privatësisë dhe e dinjitetit, jo sulm ndaj askujt,” thuhet qartë.

Reagimi mbyllet me një mesazh të fortë në emër të familjes, duke ritheksuar rëndësinë e respektit dhe kufijve personalë.
“Si familje, qëndrojmë në mbrojtje të një parimi bazë: fjala e dhënë respektohet dhe kufijtë personalë nuk tejkalohen për strategji apo vëmendje. Respekt për të gjithë!”