Bereqeti i vizitave të Kurtit në Greqi/ Deklarata e Mitsotakis në Serbi

Ka shumë mundësi që prejse Albin Kurti është bërë kryeministër i Kosovës më shumë vizita ka pasur në Greqi, sesa në Norvegji ku i jeton familja (bashkëshortja dhe vajza).

Të paktën nga njoftimet zyrtare, del se Kryeministri i Kosovës ka shkuar shtatë herë në Greqi në më pak se tri vjet.

Përsa i përket krahasimit me vende të tjera, nuk është punë që bëhet. Kurti s’e ka vizituar as Shqipërinë aq shpesh sa Greqinë.

Të fundit herë, për të shtatën me radhë, ishte në tetorin e vitit të kaluar, ku udhëtoi për të marrë pjesë në panelin diskutues të organizuar nga ‘The Economist.

Por, cili ishte rezultati i këtyre vizitave?

Sipas asaj që deklaron vetë kryeministri grek, Kyriakos Mitsotakis, “thellimi i raporteve me Serbinë”.

Mitsotakis qëndroi në Serbi në një vizitë zyrtare dhe në konferencën e  përbashkët për media me presidentin serb, Aleksandër Vuçiç, ai përveçse tha që Greqia nuk e ndryshon qëndrimin për mosnjohjen e Kosovës, lavdëroi Serbinë si shtetin më të fortë të Ballkanit.

“Qëndrimi i Greqisë ndaj Kosovës mbetet i pandryshuar dhe dialogu për normalizimin e marrëdhënieve është e vetmja zgjidhje që Greqia mbështet” –  tha Mitsotakis, i cili theksoi gjithashtu se procesi i normalizimit “do të ndihmonte veçanërisht në ruajtjen e stabilitetit në rajon”.

Ai gjithashtu potencoi se dëshiron që t’i thellojë raportet me Serbinë, meqë sipas tij, Serbia është shteti më i zhvilluar në rajonin e Ballkanit Perëndimor, dhe shtoi se në Beograd ka ardhur me një ekip më të madh ministrash sepse dëshirojmë të thellojë bashkëpunimin dypalësh.

Në anën tjetër, kur në një rast Albin Kurti ishte pyetur për vizitat e shpeshta në Greqi, ai kishte deklaruar se është “afruar njohja e Kosovës nga Greqia”, por deklarata e tij atë kohë u hodh poshtë nga Athina zyrtare, e cila deklaroi se ka ndryshim të qëndrimit, apo lëvizje në këtë drejtim.

Nga vizitat e shpeshta të Kurtit, ngjan që përfituesi i vetëm është “Tuv Hellas”, kompania greke që ka përfituar mbi 630 mijë euro në një nga tenderat e kundërligjshëm për të cilët është arrestuar, paraburgosur dhe po hetohet, kryeshefi i Korporatës Energjetike të Kosovës, Nagip Krasniqi.