Brukseli ‘hap thesin’/ 99 milionë euro për Tiranën, 18 milionë Podgorica dhe 25 milionë Shkupi

Komisioni Evropian ka njoftuar disbursimin e fondeve për Shqipërinë, Malin e Zi dhe Maqedoninë e Veriut, si pjesë e Planit të Rritjes së BE-së për Ballkanin Perëndimor. Ky hap vlerëson reformat e rëndësishme të ndërmarra nga këto vende për t’u harmonizuar më mirë me standardet e Bashkimit Evropian.

Për Shqipërinë, ky është disbursimi i parë në shumën prej 99.3 milionë eurosh, ku 46.2 milionë euro do të transferohen direkt në buxhetin e shtetit, ndërsa pjesa tjetër do të përdoret për projekte infrastrukturore përmes Western Balkans Investment Framework (WBIF).

Mal i Zi do të marrë disbursimin e dytë prej 8.1 milionë eurosh, përfshirë 3.8 milionë euro të drejtpërdrejta për buxhetin e shtetit dhe pjesën tjetër për projekte infrastrukturore përmes WBIF.

Maqedonia e Veriut gjithashtu do të marrë disbursimin e dytë prej 16 milionë eurosh, ku 7.4 milionë euro shkojnë direkt në buxhet dhe pjesa tjetër për projekte infrastrukturore me mbështetje nga WBIF.

Këto fonde, pasi miratohen nga Bordi i WBIF, do të mbështesin projekte në fusha si transporti i qëndrueshëm, energjia e pastër, digjitalizimi dhe zhvillimi i kapitalit njerëzor, në bashkëpunim të ngushtë me partnerët e Ballkanit Perëndimor dhe institucionet financiare ndërkombëtare.

Që nga fillimi i Planit të Rritjes për Ballkanin Perëndimor, shumat totale të disbursuara arrijnë 99.3 milionë euro për Shqipërinë, 18.3 milionë euro për Malin e Zi dhe 25 milionë euro për Maqedoninë e Veriut.

Ky Plan incentivon përgatitjet e vendeve të Ballkanit Perëndimor për anëtarësim në BE, duke sjellë përfitime para integrimit të plotë dhe duke përshpejtuar zhvillimin ekonomik të tyre.

Në vizitën e saj në Tiranë më 13 tetor, Presidentja e Komisionit Europian, Ursula von der Leyen, njoftoi një mbështetje prej gati 100 milionë eurosh për Shqipërinë, si pjesë e Planit të Rritjes për Ballkanin Perëndimor.

Gjatë konferencës së përbashkët me Kryeministrin Edi Rama, ajo vlerësoi progresin e fortë të vendit në reformat kyçe dhe theksoi se plani ka potencialin të dyfishojë ekonomitë e rajonit brenda kësaj dekade.

“Plani i Rritjes ka potencialin që të dyfishojë ekonomitë e vendeve të Ballkanit Perëndimor në këtë dekadë. Ne shikojmë që tashmë ka filluar të japë rezultatet e saj, unë dua të jap tre shembuj koncize. Shembulli i parë është që ju keni bërë një progres shumë të fortë në reformat kyçe, në sajë të kësaj jam shumë e kënaqur që të njoftoj pothuajse 100 milionë euro sot”.

Von der Leyen shtoi se Shqipëria pritet të ketë akses në një fond total prej rreth 1 miliard eurosh në kuadër të Planit të Rritjes.

Në korrik të këtij viti, Shqipëria dorëzoi raportin e saj të konsoliduar për kuadrin Instrumenti për Reformë dhe Rritje (RGF), që mbulon periudhën tetor 2024 – qershor 2025.

Nga 41 hapa reformash, 38 janë përmbushur plotësisht, një pjesërisht dhe dy janë në progres, ndërkohë që 5 masa janë realizuar përpara afatit, zbulon Instituti për Bashkëpunim dhe Zhvillim (CDI).

Raporti i dorëzuar përmban një progres të raportuar prej 222.6 milionë euro, ndarë mes financimit buxhetor direkt dhe Western Balkans Investment Framework (WBIF).