‘De Facto’, punë e kryer/ Plenkovic për propozimin franko-gjerman

Kryeministri i Kroacisë, Andrej Plenkovic në një debat të organizuar nga “Këshilli i Atlantikut’” ka folur për dialogun mes të Kosovës dhe Serbisë dhe propozimin franko-gjerman.

Ai është shprehur se është duke u bërë një përpjekje e jashtëzakonshme nga Franca dhe Gjermania por edhe nga shtetet e tjera të QUINT-it që të zvogëlohen tensionet dhe të shkohet drejt asaj që pothuajse do të jetë një njohje “de facto” e Kosovës nga Serbia.

Plenkovic theksoi se kjo është forma e duhur për të lëvizur përpara dhe për të hequr nga tavolina tema të cilat në vazhdimësi krijojnë tensione në veri të Kosovës, por edhe për të patur të garantuar stabilitetin e Ballkanit Perëndimor dhe Bashkimin Europian

“Besoj që ne si BE kemi nevojë për stabilitet në rajon. Kemi mjaftueshëm destabilitet nga agresion rus në Ukrainë. Duhet të jemi vigjilent dhe të kujdesshëm për stabilitetin në Ballkan. Sepse është gjëja e fundit që Perëndimi do të donte, një konflikt tjetër në rajon”, ka shtuar kryeministri kroat.

Ai po ashtu ka potencuar se nga kontaktet që ka pas me Prishtinën dhe Beogradin, ka përshtypjen se tashmë ka një qasje më pozitive për propozimin franko-gjerman se sa kur ishte prezantuar në fillim.