Deklarata e Netanjahut për pushtimin e Gazës/ Macron i alarmuar: OKB të ndërhyjë, një luftë e përhershme

Duke cituar burime nga Pallati Elysée, Macron e përshkroi këtë lëvizje si “një katastrofë që pret të ndodhë me ashpërsi të paparë dhe një nxitim të menjëhershëm drejt një lufte të përhershme”.

Ai theksoi se një përshkallëzim i tillë do të kishte pasoja të rënda humanitare dhe do të mbyllte çdo shans për paqe afatgjatë.

Franca ka propozuar një mision stabilizimi të mandatuar nga OKB-ja, i cili do të kishte për detyrë sigurimin e Rripit të Gazës, mbrojtjen e popullsisë civile dhe mbështetjen e qeverisjes palestineze.

Sipas Macron, vetëm një mekanizëm ndërkombëtar me legjitimitet të gjerë mund të ndalojë spiralen e dhunës dhe të krijojë kushtet për një zgjidhje politike.

Kriza në Gaza është përshkallëzuar ndjeshëm muajt e fundit, me bombardime intensive dhe përplasje të ashpra mes forcave izraelite dhe grupeve palestineze, ndërsa komuniteti ndërkombëtar është i ndarë mbi mënyrën e ndërhyrjes.