Dëshmia tronditëse e prokurorit special Jack Smith: Donald Trump, arkitekti i vetëm i 6 janarit

Në një dëshmi që ka tronditur sërish opinionin publik amerikan, ish-prokurori special Jack Smith ka lëshuar akuza të drejtpërdrejta ndaj Donald Trump, duke e cilësuar atë si “personin më fajtor” për trazirat e 6 janarit në Kapitol.

Sipas transkripteve të publikuara së fundmi nga Komiteti Gjyqësor i Dhomës së Përfaqësuesve, Smith ka mbrojtur me forcë punën e tij, duke deklaruar se sulmi ndaj simbolit të demokracisë amerikane “nuk do të kishte ndodhur kurrë pa Donald Trump”.

Gjatë marrjes në pyetje me dyer të mbyllura, Smith hodhi poshtë pretendimet e republikanëve se hetimet ishin të motivuara politikisht për të penguar kandidimin e Trump në vitin 2024. Përkundrazi, ai theksoi se provat treguan një komplot kriminal të mirëfilltë për të përmbysur rezultatin e zgjedhjeve të vitit 2020.

“Këto krime u kryen për përfitimin e tij. Sulmi në Kapitol nuk ndodh pa të,” u shpreh Smith, duke shtuar se bashkëpunëtorët e tjerë ishin thjesht instrumente në duart e ish-presidentit.

Provat e “forta” nga vetë republikanët

Një nga pikat më interesante të dëshmisë së Smith ishte pohimi i tij se çështja penale nuk bazohej në dëshmi kundërshtarësh, por në deklaratat e vetë aleatëve të Trump. Ai përmendi republikanë që vendosën “besnikërinë ndaj vendit para partisë”, duke denoncuar përpjekjet e paligjshme për të manipuluar procesin zgjedhor në shtete si Pensilvania.

Pse u mbyllën çështjet?

Edhe pse Smith shprehu bindjen se kishte prova “përtej çdo dyshimi të arsyeshëm”për të siguruar një dënim, të dyja çështjet e mëdha – ajo e 6 janarit dhe ajo e dokumenteve të klasifikuara në Mar-a-Lago – u mbyllën pas fitores së Trump në zgjedhjet e nëntorit 2024. Kjo ndodhi për shkak të politikës së Departamentit të Drejtësisë që ndalon ndjekjen penale të një presidenti në detyrë.

Detaje nga prapaskenat

Dëshmia zbuloi gjithashtu detaje të reja mbi tensionet brenda Shtëpisë së Bardhë gjatë ditës së sulmit. Smith citoi ish-shefin e stafit, Mark Meadows, i cili kishte përshkruar frikën e jashtëzakonshme të ligjvënësve në Kapitol, ndërsa Trump, sipas prokurorit, refuzonte të ndërhynte për të ndalur dhunën, duke rrezikuar madje edhe jetën e zëvendëspresidentit të tij.