“Dështuam se na shitën tanët”/ Kreu i PBDNJ, Vangjel Dule hedh dyshime mbi zgjedhjet e 11 Majit

Dule: Për vlerësimin tonë, nuk ka pasur zgjedhje në 11 maj. Ka pasur një proces tjetër, sfida është për gjuhëtarët t’i gjejnë një emërtim.

Në qarkun e Vlorës, ku Vangjel Dule kandidoi Partia Demokratike dështoi të ezauronte listën e mbyllur. Kreu i PBDNJ-së  beson se ka ardhur koha që opozita të kthejë gishtin e përgjegjësisë nga vetja.

Dule: Dështuam, sepse edhe njerëz nga radhët tanë u blenë, apo ranë viktima të presionit. Apo edhe fenomene të tjera, të cilat kanë të bëjnë me divergjenca brenda kampit opozitar. Imagjinoni për një moment nëse vota opozitare do të ishte e unifikuar. Por dhe ky fenomen i përçarjes opozitare  është  objektiv dhe rezultat i politikave  qeveritare. Është  investuar qeveria në  perçarjen e opozitës.

Në këto kushte, Vangjel Dule është i bindur se  protestat  duhet te ishin të pandalshme, por  një skenar i tillë nuk është në planet e afërta të lidershipit demokrat.

Dule: Mos  prisni dhe nuk duhet të presim që të na thonë se zgjedhjet ishin të pa pranueshme  dhe duhet të përsëriten. Autokracitë nuk luftohen me oratore por me zgjimin e qytetarëve.  Në çdo vend tjetër pas një procesi të tillë si ai i 11 majit, protestat do të ishin të pandalshme.

Aleati i Berishës kërkoi që opozita  pas  transparencës të merren hapa konkretë të reagimit opozitar si brenda dhe  jashtë Parlamentit.