Diplomacia funerale dhe rrëfimi te prifti/ Trump nën presion: Putini po tallet me mua

Donald Trump nxjerr përfundimet e 15 orëve të tij në Romë me një postim të gjatë në platformën e tij. Kuptimi politik, megjithatë, përmblidhet në disa rreshta: Putini nuk kishte asnjë arsye për të lëshuar raketa mbi civilët, mbi qytetet dhe fshatrat e Ukrainës, siç bëri ditët e fundit. Më bëhet të besoj se ai nuk do ta ndalë luftën, thjesht po tallet me mua dhe se kjo çështje duhet të adresohet ndryshe… Shumë njerëz po vdesin!

Nga këto fjalë, mund të konkludohet se ‘rrethimi i shkurtër’ por intensiv politik që u zhvillua në prag të funeralit të Papa Françeskut ka dhënë disa rezultate. Sepse ky është pikërisht vizioni i Volodymyr Zelensky dhe i tre udhëheqësve evropianë me të cilët Trump ishte në kontakt-Keir Starmer i Britanisë, Emmanuel Macron i Francës dhe Giorgia Meloni.

Të enjten, më 24 prill, Trump i kishte dërguar sinjalin e parë Kremlinit: Vladimir ndalo, 5,000 ushtarë po vdesin çdo javë.” Megjithatë, në të njëjtën kohë, ai i ishte përgjigjur një gazetari se në jetën e tij askush nuk e kishte “tallur” ndonjëherë.

Ndoshta presidenti amerikan mendoi se mund të riprodhonte në Romë modelin politiko-psikologjik që ai ndjek në Zyrën Ovale. Atje, Trumpi e ka situatën plotësisht nën kontroll: ai lajkaton, ngacmon ose, siç ndodhi me Zelenskyn shkurtin e kaluar, keqtrajton mysafirin. Por rruges per në Vatikan, gjërat nuk shkuan kështu.

Në mëngjes, Trump pati pengesën e parë, të lehtë. Sipas thashethemeve, Shtëpia e Bardhë e kishte planifikuar samitin me udhëheqësin ukrainas për në mëngjes herët, në Villa Taverna, rezidencën e ambasadorit të SHBA-së. Por Zelensky, i frenuar nga dyshimet e këshilltarëve të tij (nuk do të shkojmë atje, rrezikojmë të përfundojmë ‘të shtypur’ si në Uashington), mbërriti në kryeqytet vonë.

Trump nuk donte t’i ndryshonte planet e tij: Ai kishte vendosur te nisej ne SHBA në orën 13:30, ku pritej në klubin e tij të golfit në Bedminster, New Jersey. Por më pas iu desh të përshtatej, duke e gjetur veten të ulur ballë për ballë me Zelenskyn, në Bazilikën e Shën Pjetrit. Nga imazhet e publikuara nga zyra e shtypit në Kiev, duket pothuajse si një rrëfim. Një rast i rrallë: presidenti amerikan duket se dëgjon më shumë sesa flet dhe në fund, Shtëpia e Bardhë do ta përcaktonte takimin si “shumë produktiv”.

Rrethimi vazhdoi, madje edhe gjatë meshës mortore. Trumpit sigurisht që nuk i pëlqeu pjesa e predikimit të Kardinalit Giovanni Battista Re, i cili kujtoi një frazë të Françeskut: “Ndërtoni ura dhe jo mure”. Françesku kete ia kishte drejtuar atij, Trumpit te ulur në rreshtin e parë të mysafirëve…

Kreu i Shtëpisë së Bardhë po nxiton të mbyllë negociatat me Vladimir Putinin dhe të përfitojë nga Zelensky. Deri më tani, ai i ka përmbushur pothuajse të gjitha kërkesat e presidentit rus: njohjen e aneksimit të Krimesë; kontrolli i territoreve të pushtuara me forcë; Anulimi i perspektivës së NATO-s për Ukrainën. Ai nuk i pranoi asgjë ukrainasit. Në fakt, ai këmbëngul që marrëveshja për metalet e rralla të nënshkruhet shpejt. A do të ndryshojë diçka tani?

Por Presidenti gjerman Frank-Walter Steinmeier na nxit të mos “presim shumë nga diplomacia funerale”.

Zelensky, Macron dhe Starmer u përqendruan në çështjen më urgjente: Shtetet e Bashkuara duhet të mbështesin misionin e ndërhyrjes në shkallë të gjerë, ose trajnimin e personelit ushtarak ukrainas, për të cilin po punojnë qeveritë franceze dhe britanike.

Gazeta britanike The Daily Telegraph shkruan se “zyrtarët amerikanë thuhet se janë të hapur për të ofruar mbështetje inteligjence dhe logjistike për ushtarët britanikë dhe evropianë si pjesë e një marrëveshjeje paqeje”. Do të shohim nëse kjo disponueshmëri do të konfirmohet nga vetë Trump.