Sekretari amerikan i Mbrojtjes, Pete Hegseth, ka fajësuar Iranin për armatosjen e luftëtarëve Houthi në Jemen, duke paralajmëruar se Teherani do të përballet me pasoja në kohën dhe vendin që do të zgjedhë Uashingtoni.
Presidenti i SHBA-së, Donald Trump, nisi një fushatë sulmesh ajrore dhe detare në shkallë të gjerë kundër rebelëve në mars, me qëllimin e deklaruar për të mbrojtur anijet në Detin e Kuq. Grupi, të cilin Uashingtoni e përshkruan si “të mbështetur nga Irani”, kishte synuar anije tregtare pranë brigjeve të Jemenit, si pjesë e strategjisë së tij për të ushtruar presion mbi Izraelin për shkak të operacionit të tij ushtarak në Gaza.
Hegseth iu drejtua Teheranit në një mesazh në X të enjten, duke thënë: “Ne e shohim mbështetjen tuaj vdekjeprurëse për Huthit. Ne e dimë saktësisht se çfarë po bëni.”
“Ju e dini shumë mirë se çfarë është e aftë të bëjë ushtria amerikane – dhe ju u paralajmëruat. Do të paguani pasojat në kohën dhe vendin që ne zgjedhim”, shkroi ai.
Shefi i Pentagonit ndau gjithashtu një pamje të ekranit të një postimi të publikuar nga Trump në platformën e tij Truth Social në mesin e marsit, në të cilin ai këmbënguli se Irani po “dikton çdo lëvizje” që bëjnë Houthit, si dhe po i furnizon ata me armë, fonde dhe inteligjencë. “Çdo e shtënë e shkrepur nga Huthit do të shihet, që nga ky moment e tutje, si një e shtënë e shkrepur nga armët dhe udhëheqja e Iranit”, shkroi presidenti amerikan atëherë.
