‘Do t’ju vras’/ Dëshmitari i masakrës në Beograd rrëfen tmerrin

Banorët e fshatit Malo Orasje të Mlladenovës kanë rrëfyer momentet tragjike të mbrëmjes së djeshme, kur një 21-vjeçar qëlloi për vdekje 8 persona dhe la të plagosur 14 prej tyre.

Ngjarja e pati zanafillën në një lokal e më pas në këndin e lojërave në fshatin e lartpërmendur, ku të rinjtë po festonin festën e Shën Gjergjit pas ditës së zisë, që ishte shpallur dje në Serbi, pasi një 14-vjeçar kishte qëlluar mbi rojën e shkollës dhe tetë nxënës.

Megjithatë, e gjithë kjo u pasua nga një tjetër masakër e përgjakshme. “Ai (vrasësi) doli nga makina dhe tha: Shtrihuni në tokë, do t’ju vras ​​të gjithëve. Një nga të rinjtë e pranishëm në festë mendoi se autori po bënte shaka dhe i tha: A do ndonjë birrë? Hajde ulu”, tha një banor për mediat serbe.

Më pas ata rrëfejnë se 21-vjeçari u largua dhe pasi dëgjuan të shtënat, banorët njoftuan menjëherë të alarmuar policinë. Policia arrestoi 21-vjeçarin pas 8 orësh arratisje, në afërsi të Kragujevacit. Ndërkohë, u ndaluan edhe xhaxhai dhe gjyshi i tij, pasi dyshohet se e ndihmuan të fshihej.