Doli prapë si budalla, Ponosh për paralajmërimin e Vuçiçit

Ish-shefi i Shtabit të Forcave të Armatosura të Serbisë, Zdravko Ponosh, në një intervisitë për gazetën serbe “Nova”, duke komentuar mbi paralajmërimin e presidentit të Serbisë, Aleksander Vuçiç, i cili njoftoi për mundësinë e tërheqjes së Serbisë nga Këshilli i Evropës nëse në këtë organizatë pranohet Kosova, tha se Vuçiç doli “pothuajse si budalla” para publikut.

Kreu i frontit opozitar “Qendra e Serbisë” shtoi se mundësia që Serbia të largohet nga Këshilli i Evropës nëse Kosova bëhet anëtare është një marrëzi politike që shërben për të ngritur temperaturën e audiencës serbe, sepse, sipas tij, pala serbe u zotua në kuadër të procesit të dialogut se s’do ta kundërshtojë anëtarësimin e Kosovës në asnjë organizatë ndërkombëtare.

“Ai formulimi se ‘do të mendojnë diçka’ shërben për të ngritur temperaturën për audiencën vendase. Hyrja e Kosovës në organizatat ndërkombëtare është diçka për të cilën Vuçiç është pajtuar në Marrëveshjen e Brukselit. Nuk dihej as se në çfarë rendi do të pranohej Kosova në organizatat ndërkombëtare në bazë të asaj marrëveshjeje, teksa presidenti serb tani po dramatizon publikun vendas” – deklaroi Ponosh, sipas te cilit Vuçiç
“nuk e ka problem hyrjen e Kosovës në Këshillin e Evropës, as faktin se doli ‘pothuajse budalla’ ashtu sikurse tha vetë ai. Ka të bëjë vetëm me maskimin e asaj që po bën dhe të lajë veten nga përgjegjësia. Ky është edhe qëllimi i fotove të shpeshta të presidentit serb me ushtrinë, për të rritur shikueshmërinë dhe për të demonstruar zgjuarsi” –  shtoi ndër të tjera opozitari serb.

Serbia shkeli sërish marrëveshjen e fundit kur votoi kundër raportit të raportueses për Kosovën në Komitetin për Politikë dhe Demokraci të Këshillit të Evropës, Dora Bakoyannis, ku rekomandohet që Kosova të anëtarësohet në këtë organizatë sepse neni 4 përcakton që shteti serb nuk do ta pengojë anëtarësimin e Kosovës në asnjë organizatë ndërkombëtare.

Kryetari i Partisë Qendra e Serbisë, u shpreh gjithashtu se situata në Kosovë është rezultat i marrëveshjes së Vuçiçit me Albin Kurtin dhe se presidentit serb tani i mbetet vetëm të thotë se është mashtruar dhe të kthejë vëmendjen te tema të tjera.

“Sipas marrëveshjeve të arritura nga Vuçic me Kurtin, Kosova i bashkohet organizatave ndërkombëtare, përfshirë Këshillin e Evropës. Nuk kalon pa u vënë re as anëtarësimi I Kosovës në Komitetin Olimpik, dhe kjo tani po shqetëson edhe votuesit e tij” –  tha Ponosh.