Shkrime

Dy të (pa)vërtetat që ndërkombëtarët i kanë krijuar për Albin Kurtin

Nga Baton Haxhiu

Këto ditë po diskutohet për vendimin e Bankës Qendrore të Kosovës për të ndaluar përdorimin e dinarit serb si monedhë zyrtare dhe më pas po shqyrtohen dy teori mbi strategjinë e Albin Kurtit lidhur me Asociacionin e Komunave me Shumicë Serbe.

Në një anë, përmendet një teori optimiste, sipas së cilës Kurti, me veprimet e ashtuquajtura sovraniste, synon “të forcojë sovranitetin e Kosovës” dhe të mbrojë pozicionin e saj në dialogun me ndërkombëtarët. Në anën tjetër, shfaqet një teori skeptike, që e shikon Kurtin si një lider egocentrik, duke supozuar se ai mund të kërkojë avantazhe elektorale pa marrë parasysh zotimet e bëra në dialog.

Përmendet dilema mbi qëllimin e vërtetë të Kurtit dhe shprehet një preferencë personale për teorinë e parë.

Çfarë mendoni se duhet të bëjë Kurti në këtë situatë?

T’i sqarojmë për lexuesin të gjitha më radhë.

Vendimi i Bankës Qendrore të Kosovës për të ndaluar përdorimin e dinarit serb si monedhë zyrtare, ashtu sic e përcakton Kushtetuta, është vlerësuar si një hap i drejtë. Nëse Kosova do të konsiderohet si një shtet i pavarur, është e rëndësishme që të ndërmerren hapa të tilla.

Megjithatë, kam dyshime serioze lidhur me qëllimet e Albin Kurtit. Në arenën ndërkombëtare; siç përmenda më lartë, ekzistojnë dy teori mbi strategjinë e tij që po qarkullojnë në hijen e dialogut.

E para; Një teori optimiste sugjeron se Kurti ka synuar të forcojë sovranitetin e Kosovës përpara themelimit të Asociacionit të Komunave me Shumicë Serbe (pra, siç e përcakton draft-statuti i propozuar nga Bashkimi Evropian, struktura ilegale e serbëve të Kosovës, të kalojë në legalitet dhe të parapërgatitet për të udhëhequr me Asociacionin).

E dyta; Teoria skeptike, nga ana tjetër, e shikon atë si një lider egocentrik që operon për interesa elektorale, duke e neglizhuar dialogun dhe zotimet e bëra.

Shumëkush ka dëshirë ta shoh Kurtin brenda kornizave të teorisë optimiste. Nëse ai arrin të themelojë Asociacionin duke respektuar zotimet dhe dialogun, supozohet se do të forconte pozitën e Kosovës ndaj partnerëve ndërkombëtarë dhe do të siguronte stabilitet politik.

Megjithatë, ka shqetësime se ai mund të ndjekë një strategji më egocentrike, që mund të sjellë pasoja negative për Kosovën dhe shqiptarët në përgjithësi.

Si përfundim, është e rëndësishme që ne si analistë dhe qytetarë të diskutojmë thellë mbi këto çështje dhe të ndajmë pikëpamjet tona.

Në një situatë më normale, ku qeveria e një vendi me përgjegjshmëri tregon synimet e veta qartësisht dhe planet përmes të cilave tenton realizimin e synimeve, nuk do të kishte nevojë për shpjegime supozuese, sepse rrugëtimet do të ishin të ngurtësuara në strategji shtetërore. Por, fatkeqësisht, Kosova ka qeveri të shtetit, por vetëm strategji qeveritare, e cila konsiston në deklarime të kundërta dhe kundërshtuese të zyrtarëve të saj, duke krijuar kështu rrëfime paralele për çështjen e njëjtë.

Prandaj, duhet parë situatën nga një perspektivë e qartë dhe qasje kritike. Në këtë rast pyetja që shtrohet është: Çfarë strategjie duhet të ndjekë Albin Kurti në këtë moment të rëndësishëm?

Nëse VV dhe qytetaret qe e kanë votuar e pranojmë teorinë optimiste, atëherë do të duhej që ai të vazhdojë të “forconte sovranitetin” dhe të dialogojë me ndërkombëtarët për themelimin e Asociacionit në përputhje me marrëveshjet ekzistuese.

Në anën tjetër, teoria skeptike na bën të pyesim nëse Kurti po ndjek një rrugë egocentrike dhe a mund të sjellë kjo rruge pasoja të rrezikshme për qëllimet afatgjata të Kosovës?

Është e rëndësishme të shprehim shqetësimet tona mbi mundësinë që Kurti të vazhdojë dëmtimin e stabilitetit politik dhe pozitën e Kosovës në skenën ndërkombëtare.

Megjithatë, duke ecur më tej në analizën për Kurtin, duhet të kthehemi në thelbin e çështjes: A ka Kurti një vizion të qartë dhe të qëllimshëm për të ardhmen e Kosovës? Kjo pyetjeje mbetet thelbi i diskutimit dhe detyrimi për ne të gjithë është të përfshihemi në një debat të hapur dhe të ndërgjegjshëm për të gjetur përgjigje dhe rrugëtimin më të mirë për shtetin tonë.

Përtej këtyre pyetjeve, diskutimi për strategjinë e opozitës dhe improvizimet në skenën politike vazhdon. Është thelbësore që të analizojmë se si opozita ka përgatitur dhe ndërmarrë hapat e saj përballë sfidave aktuale. Nëse kemi ndonjë arsyetim për shqetësim, duhet ta shprehin hapur dhe të kërkojnë alternativa të qëndrueshme.

Sidoqoftë, një gjë është e sigurt: koha e sotme është vendimtare për të ardhmen e Kosovës. Ndaj, ne si shoqëri duhet të kemi një angazhim të përbashkët për të ndjekur zhvillimet, të kritikojmë ato që shohim të papranueshme, dhe të propozojmë zgjidhje konstruktive kur shihet qartësisht se të zgjedhurit për të gjetur zgjidhje janë në një nyje që shpesh duket e pazgjidhshme.

Në fund të kësaj analize, shtrohet një sfidë e rëndësishme: Si mund të përmirësojmë dialogun dhe bashkëpunimin mes aktorëve të ndryshëm politikë për të garantuar një të ardhme të qëndrueshme për të gjithë qytetarët e Kosovës?

Të vetëdijshëm se është Qeveria ajo që mban çelësat kryesorë në hapjen e dyerve drejt stabilizimit shoqëror e politik, por të pasigurt se ka synim dhe qëllim diçka të tillë.

S’përjashtohet mungesa e dijes këtu, por nga disa lëvizje krejt të pakuptueshme politike, s’mund ta bësh fajtorë askënd nëse sinqerisht pyetet cili është motivi i lëvizjes politike të strukturës qeveritare?

Nuk është e fajshme as pyetja e shumëkujt: A ka Albin Kurti dhe VV-ja gatishmëri dhe a ka opozita fuqi, që në emër të Kosovës të kafshoi dhimbjet dhe dëmet e shkaktuara nga VV-ja?

Por, po i kthehem edhe njëherë fillimit.

Kam përfshirë dy skenarë që mund të shpjegojnë strategjinë e Albin Kurtit në lidhje me Asociacionin e Komunave me Shumicë Serbe të rrjedhur nga dy teoritë që u shpjeguan më lartë.

Skenari i parë, i mbështetur në perspektivën optimiste, supozon se Kurti është i përkushtuar ndaj marrëveshjes së dialogut dhe synon themelimin e Asociacionit në përputhje me kërkesat ndërkombëtare.

Ky skenar pohon se “veprimet sovraniste” të Kurtit janë një mënyrë për të përgatitur terrenin për krijimin e Asociacionit.

Skenari i dytë, i mbështetur në perspektivën skeptike, nxjerr se Kurti mund të ndjekë një strategji egocentrike, duke mos marrë parasysh zotimet e bëra më parë. Ky skenar shpërfaqë dellin e Kurtit që të operojë elektoralisht dhe në interes krejtësisht vetjak duke prodhuar avantazhe elektorale me veprime të pamatura që qëllim final kanë mungesën e një rezultati final.

Pra, neglizhim i dialogun, duke rrezikuar stabilitetin politik dhe pozitën e Kosovës në skenën ndërkombëtare.

Këta dy skenarë shërbejnë si baza për diskutimin mbi strategjinë e Kurtit dhe paraqesin dilema të cilat, me një përfundim të pavarur, tregojnë se shteti i Kosovës ndodhet në një moment vendimtar.

Nëse shkojmë tutje ne sqarim më të detajuar se si duket kjo ne interpretime të ndërkombëtarët, atëherë mund shtojmë edhe pak gjëra për skenarët.

Nëse thuhet se Teoria e parë është optimiste, atëherë komuniteti ndërkombëtar e ka të qartë se është teoria në të cilën supozohet që Albin Kurti është tërësisht i përkushtuar ndaj marrëveshjes bazike dhe aneksit të zbatimit të dakorduar në Ohër.

Sipas kësaj teorie, Albin Kurti është i vetëdijshëm që partnerët ndërkombëtarë të Kosovës, përfshirë edhe aleatët kryesorë, si SHBA, Gjermania dhe Mbretëria e Bashkuar, njëzëri presin që Kosova ta themelojë Asociacionin, si detyrim që rrjedh nga dialogu i mëhershëm, por edhe nga vetë marrëveshja bazë, të cilën Kurti e ka pranuar.

Pra, ata supozojnë që Albin Kurti e di që tashmë Asociacioni është kthyer në një detyrim të Kosovës ndaj vetë aleatëve të vet kryesoër, d.m.th është diçka e pashmangshme.

Ithtarët e kësaj teorie pohojnë që me (targat, zgjedhjet në veri, simbolika e flamurit në komuna, dinari dhe të gjitha të tjerat), Albin Kurti është duke e kornizuar autoritetin e Kosovës para vendimit për themelimin e Asociacionin. Pra, kjo teori pohon se këto veprime janë të domosdoshme, sepse me anë të tyre parandalohet mundësia që Asociacioni nesër të mund të sillet si shtet brenda shtetit (besojnë ndërkombëtarët).

Ta qartësojmë edhe më thellë. Pra, kjo teori pohon që para se të themelohet Asociacioni i komunave me shumicë serbe, së pari duhet të jetë e qartë formalisht për të gjithë (përshirë serbët e Kosovës dhe vetë Serbinë) që këto komuna janë dhe veprojnë vetëm si komuna të Kosovës. Para se Asociacioni të mund të menaxhojë ndihmën financiare që Serbia e jep për serbët e Kosovës (një e drejtë kjo legjitime që nuk e mohon askush), së pari duhet të qartësohet që kjo mund të ndodhë vetëm nëpërmjet dhe brenda një sistemi të konsoliduar financiar të Kosovës.

Pra, fakti që Serbisë i njihet e drejta të derdhë fonde në llogarinë e Asociacionit, kjo nuk do të thotë që Asociacioni tani ka të drejtë që të sillet si një byro që menaxhon dinarin serb.

Para se Asociacionit, përkatësisht katër komunave veriore t’u njihet e drejta për të nominuar drejtorin rajonal për rajonin verior, së pari duhet të jetë e qartë që policia në veri është Polici e Kosovës dhe të gjithë policët duhet të jenë të përkushtuar për mbrojtjen e rendit juridik të Kosovës. Dhe të tjera supozime të ngjashme.

D.m.th, kjo teori optimiste, dhe me anë të së cilës shpjegohet durimi i partnerëve ndërkombëtarë me veprimet e Albin Kurtit, supozon që, në fund të të gjitha veprimeve, Albin Kurti do ta themelojë Asociacionin, sipas modelit të propozuar evropian.

Gjithnjë sipas këtij skenari dhe duke e bërë këtë, Albin Kurti i arrin dy fitore të rëndësishme politike: fiton elekotralisht me kartën e forcimit të sovranitetit të Kosovës, por edhe i riparon dhe i riforcon raportet me partnerët dhe aleatët perëndimorë.

Teoria e dytë është tërësisht skeptike dhe plot me brenga për strategjinë e Albin Kurtit.

Sipas kësaj teorie, Albin Kurti ndjek një strategji të fokusuar tërësisht në interesa elektorale, pas asnjë konsideratë për zotimet që merr në kuadër të dialogut. Pra, ithtarët e kësaj teorie pohojnë që Albin Kurti është një egocentrik i sëmurë që mendon se mund t’ia imponojë vullnetin e tij edhe kryeqendrave botërore, me pretendimin që në fund, Perëndimi do të heqë dorë nga presioni për Asociacionin dhe do të rreshtohet tërësisht pas tij.

Sipas kësaj teorie, Albin Kurti nuk ka vetëm ambicie panshqiptare, por ai e sheh veten edhe si lojtar në përplasjet ideologjike në nivel evropian dhe më gjerë. Ithtarët e kësaj teorie shkojnë edhe më larg duke e përshkruar Albin Kurtin si një dogmatik që e urren ekzistencën e Kosovës si shtet dhe që projekton një konflikt rajonal me anë të cilit ai do të instalohej si një lider panshqiptar.

Do të ndalem me kaq, por pyetja që tani është e drejtë ta shtrojmë, cila është vërtet strategjia e Albinit?

Shkrime

Vdekja e përgjegjësisë politike dhe degradimi i maxhorancës në një çetë bazhibozukësh

Nag Klodian Tomorri

Kur shpërtheu skandali i Unazës së Madhe, Edi Rama ishte në fillim të mandatit të dytë. Pusi i Rilindjes nuk ishte qelbur ende i gjithi dhe të paktën formalisht ekzistonte ende një fije e përgjegjësisë politike.

Një javë pasi Ylli Rakipi publikoi dokumentat që dëshmonin se DH Albania kishte falsifikuar firmën e sekretarit të shtetit në Delaëare, Damian Gjinkuri u detyrua të udhëronte anullimin e tenderit 18 milionë euro. Praktikisht shtetit nuk iu shkaktua asnjë dëm sepse tenderi nuk u zhvillua. Por kjo nuk e shpëtoi dot as Gjiknurin dhe as vartësin e tij në ARRSH.

Edi Rama e largoi Damian Gjiknurin nga qeveria, ndërsa Belinda Balluku e nxorri me shkelma Afrim Qendron nga zyra e drejtorit të ARRSH. Dhe ky nuk ishte rasti i vetëm. Në vitin 2018, për shkak të protestave të studentëve apo skandaleve të tjera publike u largua nga detyra gati gjysma e qeverisë.

Por tashmë pusi është qelbur tërësisht dhe përgjegjësia politike ka vdekur. Pasardhëses së Damian Gjiknurit ja kapën rob drejtorin e ARRSH-së. Këtë herë, në rrafshin e përgjegjësisë, skandali ishte edhe më i rëndë se sa ai i Unazës.

Krahu i djathtë dhe njeriu më i afërt i Ballukut nuk u arrestua se një kompani i kishte falsifikuar letrat në tender. Ai tenderat ja jepte vetes dhe paratë e qytetarëve i çonte në kontot e tij private. Megjithatë politikisht nuk ndodhi asgjë. Evis Berberi u arrestua nga SPAK, ndërsa Belinda Balluku vazhdon punën si ministrja më e fuqishme e qeverisë.

Standardi ka vdekur dhe përgjegjësia politike është kallur me kohë. Por asgjësimi i llogaridhënies e shndërron të gjithë shtetin në një kënetë. Ashtu siç po ndodh.

Erion Veliaj, një nga figurat kyç të maxhorancës socialiste tashmë ngjan me Gjeneralin e Ushtrisë së Vdekur të Kadaresë. Thuajse të gjithë drejtorët dhe ish drejtorët e tij më të rëndësishëm gjenden në burg ose kandidatë serioz për të shkuar aty.

Por ndërsa SPAK ka dekapituar të gjithë zinxhirin komandues të Bashkisë, gjenerali vazhdon në detyrë, pa asnjë pasojë politike. Edhe pse në këtë rast përgjegjësia politike është më direkte. I gjithë grupi i drejtorëve të arrestuar janë emërime ekskluzive të Veliajt dhe tenderat që ata i kanë dhënë vetes janë prokurime me autoritet kontraktor Bashkinë e Tiranës.

Degradimi i qeverisjes dhe vdekja e standardit të llogaridhënies politike është ftesë e hapur për plaçkitje. Mesazhi që vjen nga koka është i qartë. Këtu vjedhin të gjithë dhe përgjegjësia politike e ka humbur kuptimin. Kush shpëton, mirë. Kush kapet e ka për qederin e vet.

Ndaj sot Edi Rama ngjan shumë me Sulltan Fetihun. Kur iu vërsul Konstandinopojës, Mehmeti ishte i qartë me jeniçerët e tij. “Merrni plaçkë sa të doni, mua më duhet vetëm Konstandinopoja.” Kjo është edhe filozofia e Rilindjes sot. Bazhibozukët mund të plaçkisin gjithë shtetin. Sulltanit i duhet vetëm pushteti. /

Shkrime

Veliaj në rastin më të keq bashkëpunëtor, në më të mirin i paaftë

Ajo që lexohet në dosjen e hetimeve të SPAK për aferën e kompanisë ‘5D Konstruksion’, nuk është as më pak e as më shumë se ato që dëgjojmë çdo ditë për mënyrën se si paracaktohen tenderat dhe se si shteti vendos kë të bëjë të pasur duke blerë pushtet.

Duke kontrolluar në procedurat e prokurimeve që i janë dhënë kësaj firme, në total të dalin një dyzinë kompanish të cilat marrin pjesë në tendera herë bashkë dhe herë kundër njëri-tjetrit. Përfituesit numërohen me gishtat e dorës dhe ata që nuk janë rrethi i tyre skualifikohen në të gjitha fazat.

Çudia që na krijuan hetimet e kompanisë 5D, lidhet me risinë se në dallim nga skema klasike që kemi dëgjuar, drejtorët nuk merrnin përqindje në tendera por ia çonin të gjitha paratë firmës së tyre.

Është naive që çdokush në këtë vend të besojë se ata që sot punojnë në poste drejtuese në administratë rropaten për të mirën e popullit, dalin lypin vota ditë e natë në fushatë dhe kënaqen me një pagë që në rastin më të mirë nuk kalon 1.200 euro. Me pagat që sot ka shumica e institucioneve publike, ai që kërkon të pasurohet me dinjitet ose kalon në sektorin privat ose largohet nga ky vend.

Naive është po ashtu të besohet se kryebashkiaku Erion Veliaj nuk ka ditur gjë për këtë aferë. Përgjegjësia e parë ka të bëjë me rolin e tij si titullar i Autoritetit Kontraktor në 8 procedura ku fitues ka qënë kompania ‘5D Konstruksion’. SPAK ka vërtetuar se pronarë janë drejtorët më të rëndësishëm të Bashkisë Tiranë dhe njerzit e afërt të tij. A duhet hetuar nëse ka patur dijeni për konfliktin e interesit, njësoj siç është hetuar roli i ish-ministrit Ilir Beqaj te dosja e ‘Sterilizimit’?

Së dyti, titullari i Autoritetit Kontraktor është personi i cili cakton njësinë e prokurimit, antarët e Komisionit të Vlerësimit të Ofertave, shpall fituesin dhe lidh kontratën. Po ashtu, në 3 raste Erion Veliaj është njoftuar me shkresë nga operatorët pjesëmarrës në tender për ankesa që kanë patur për skualifikim të padrejtë.

Sekrete nga dosja e drejtorëve të arrestuar të Veliajt (faksimilet)
Natyrshëm lind pyetja: A është Erion Veliaj ai që lexon ankesën dhe cakton antarët e Komisionit të Shqyrtimit të Ankesave? Si ka vepruar ai në rastin që disa kompani e kanë njoftuar se oferta e tyre më e ulët, që mund t’i kursente para bashkisë dhe qytetarëve është skualifikuar padrejtësisht? Përse komisioni i ankesave i ngritur prej tij, nuk konstatoi shkeljet që gjeti SPAK në këto procedura?

Përgjegjësia e tretë është morale. Përse Veliaj nxitoi të mbështesë drejtorët e tij dhe të ‘duartrokasë’ kallzimin që ata bënë për shpifje pas denoncimit të kandidatit të PD në zgjedhjet lokale? Përse nuk ngriti një audit, nuk ushtroi një kontroll, nuk premtoi hetime?

A duhet të kërkojnë falje çingijet që bënë thirrje për të votuar Veliajn?
Këtë histori sido që ta kthesh, të gjitha rrugët të çojnë te konkluzioni se ose përfitimet e paligjshme janë bërë me bekimin e tij, ose institucioni që ai drejton ka rënë në të gjitha instancat. Në rastin më të keq është bashkëpunëtor dhe në rastin më të mirë është i paaftë për të drejtuar bashkinë!

♦Marrë nga Facebook i autores Ola Xama

Shkrime

Kosova ndizet dhe shuhet nga Aleksandër Vuçiç

“Është e qartë se Beogradi, përmes inkuadrimit të dy anëtarëve të Qeverisë së re, të cilët janë nën sanksionet e Shteteve të Bashkuara, është kujdesur për të ushqyer marrëdhëniet me Moskën” – keshtu deklaroi Bodo Weber dhe sipas tij, gjithsesi kjo nuk do të thotë braktisje e politikës së uljes në dy karrige (midis Lindjes dhe Perëndimit)”

Sipas bashkëpunëtorit te lartë te Këshillit joqeveritar për Politikat e Demokratizimit ne Berlin, “Qeveria e re e Serbisë, e cila u votua të enjten, do të ketë 25 portofolë dhe pesë ministra pa portofol dhe mes tyre spikasin dy zyrtarë nga “lista e zezë” e Shteteve të Bashkuara.

I pyetur nëse përbërja e re e Qeverisë së Serbisë do të thotë kthesë djathtas, duke pasur parasysh se në të përveç progresistëve dhe socialistëve, eshtë edhe Aleksandar Vulin si zëvendëskryeministër, si dhe lider i së djathtës nga partia Zavetnici, Weber tha se nuk sheh ndonjë ndryshim ideologjik në politikën e regjimit të Aleksandër Vuçicit në përbërjen e qeverisë së re.
Duke komentuar ndikimin e Rusisë në emrat e qeverisë qe tani drejtohet nga Millosh Vucevic, duke marrë parasysh kthimin e Aleksander Vulin dhe Nenad Popoviç, të dy non grata e të shenjuar si persona të lidhur me Kremlinin, Weber u shpreh se anëtarësimi në BE ka qenë prej kohësh një mjet për konsolidimin dhe mirëmbajtjen e Vuçicit në pushtet, dhe forcimi i pozitës ndërkombëtare të Serbisë pa orientime të qarta ideologjike.

“Meqenëse BE-ja nuk mundi të gjente forcë për të ndaluar politikën e saj të dështuar prej kohësh të ‘zbutjes’ ndaj regjimit autoritaro-autokratik në Serbi, shfaqja e zbrazur nga çdo thelb vazhdon, në sy të të gjithëve, dhe qe eshte I ashtuquajturi eurointegrimi i Serbisë.

Prandaj, Vuçic me të drejtë nuk duhet të shqetësohet shumë se çfarë lloj mesazhesh po i dërgohen nga Brukseli dhe kryeqytetet e tjera evropiane” – deklaroi Weber, duke shtuar se “Iniciativa gjermano-franceze per dialogun politik Kosove-Serbi, për faktin se bazohej pikërisht në atë politikë të dështuar, u shua pa u ndezur dhe u shoqerua me një përshkallëzim të paprecedentë në veri të Kosoves, të cilën kryeqytetet perëndimore ende nuk janë gati ta pranojnë…………….

“Dhe teksa rolin udhëheqës në atë politikë “zbutëse” perëndimore e pati SHBA-ja, prandaj dhe presidenti serb me sa u pa nuk ishte shumë i shqetësuar për reagimin amerikan si pasoje e kthimit të dy ministrave të sanksionuar në Qeverinë e re. Dhe per kete ai pati një arsye të fortë… –Sepse politikëa e sanksionimit të zyrtarëve serb afër Kremlinit, ishte dhe mbetet krejtësisht e palidhur me politikën e përgjithshme të administratës amerikane ndaj Beogradit” – potencoi Weber.

Është e qartë, mendon ai, se Vuçiç është kujdesur që përmes këtyre emërimeve qeveritare, të ushqehen marrëdhëniet me Moskën, në kohën kur ai po ndihet nën presion për shkak të vendimit të Këshillit të Evropës për pranimin e Kosovës dhe rezolutës së Kombeve të Bashkuara për gjenocid në Srebrenicë.

“Mirëpo, kjo nuk do të thotë se Vucic ka braktisur politikën e uljes në dy karrige” – theksoi bashkëpunëtori i lartë i Këshillit joqeveritar për Politikat e Demokratizimit ne Berlin.

OPINION

Qeveria që na duhet

Nga Edison Ypi

Të zgjidhen si duhet emrat e përshtatshëm që meritojnë të kryejnë detyrat sa të larta e të vështira të një qeverie që na duhet, teknike, kalimtare, provizore, quaje si të duash, është detyra urgjente që duhet të na preokupojë të gjithëve për të na nxjerrë një minutë e më parë nga kullat e fildishta, guackat familiare, kolltuqet e rehatit, dyshekët e ngrohtë, shtretrit e dafinave mbi të cilët na ka zënë gjumi, dhe t’i futemi punës si turku supës për t’i bërë sa më shpejt realitet ëndërrat në shkop që populli liridashës shqiptar prej shekujsh me sy hapur sheh.

Meqënse, me gjasa, ministrat e qeverisë në fjalë, do jenë më tepër të “asaj” se të “kësaj” bote, do ketë probleme logjistike lidhur me varrosje-çvarrosjen e mishrave të kalbura, skeleteve të hallakatura, kockave të thyera. Megjithatë s’është për tu dekurajuar. Për një qeveri individësh me kontribute të shquara me fakte dhe jo me llogje, me pak dëshirë dhe shumë punë, zgjidhja gjithmonë gjindet

Në mënyrë që edhe populli ynë i lavdishëm i shumvuajtur të ketë më së fundi qeverinë që meriton, ja një listë e mirëmenduar, e vetmja që mund ta nxjerri Kombin nga gjëndja e trazuar ku ndodhet, nga moçali ku është zhytur e mbytur, brenda të cilit moçal lahet, shplahet, krihet, hekuroset, ha, pi, vishet, mbathet, bën qef, udhëton, hedh ickla, por s’dihet, dhe as kuptohet, pse thotë se po lëngon.

Kryeministër, teneqexhiu që ka dhënë edhe jetën nëpër biruca për një qeverisje shembullore sa më demokratike – Koçi Xoxe.

Ministër i Jashtëm, kaurri europian që për ardhmëninë e Shqipërisë dhe iluminimin e shqiptarëve iu nënështrua sakrificës më sublime që mund të imagjinohet, u bë synet – Princ Vidi.

Ministër i Luftës, kush mund ta kryejë më mirë këtë detyrë sa të shenjtë e të vështirë se Haxhi Qamili që e kishte më kollaj të pushtonte Anglinë dhe Gjermaninë se sa Kavajën dhe Ndroqin ?
Ministër i Rendit, e vetmja zgjedhje që nuk guxon ta kundërshtojë askush – Xhaferr Deva.
Ministër i intrigave, Beu qefli me nam i kupacit të gjizës së Shijakut dhe balerinave të Parisit – Esat Toptani.
Ministër i Diversantave – Ekrem Bardha, lum ai që s’e njeh.
Ministër pa portofol, kqyrës i natyrës dhe thurës i vargjeve rrënqethës, ndonjëher edhe tallës deri therës – Lasgush Poradeci.
Ministër i Turizmit Biblik, ai që çudinë mrekulluese frymëndalëse të miliona turistave e ideoi dhe e mundësoi – Shtatlartësia e Tij.
Ministër i tallavasë, urrejtësi më i egër i saj, i vetmi që kësaj katandisje artistike i vjen hakut – Frederik Ndoci.
Ministër i Qënërisë mund të emërohet secili nga legenat e banaqeve, por s’do ishte keq dhe një budalla kok shinik çun oficeri që bën si sapient, si intelektual i ndritur, si aristokrat i thekur, që ja harrova emrin, ama, me apo pa dashje, në rëntë në gojën time, do e ha dhe do e pështyj disa herë si frulatori supën e perimeve.
Ministreshë e shkopave të çadrave, atyre të diellit të plazhit, dhe atyre të shiut të ngatrresave verbale-kuptimore – Olta Xhaçka.
Ministreshë e futjes së dy këmbëve në një këpucë kundërshtarit politik përmes retorikës brilante, ajo që duke ushtruar talentin mahnitës s’kursen askënd – Elisa Spiropali.
Ministër i përdhosjes pa asnjë arsye dhe pa asnjë të drejtë të ambasadorëve, trupave diplomatike, sharjes me libër shtëpie diplomatët e akredituar në Tiranë, ai që këtë turp e ka zanat – Xhahil Sahanlëpirsi.
Ministër fuqiplotë i administrimit Shkumbin e tatëpjetë – Doktori.
Ministër i gjithpushtetshëm Shkumbin e përpjetë – Ilir Meta.
Ministër i Etimologjisë Folklorike, ai që mender shkencën në fjalë e ka nxjerrë nga brima e bythës – Petro Zheji.
Ministër i bijve budallenj dhe nipërve idiotë – Ahmet Zogu.
Ministër i kafshërisë, rrugaçërisë, imoralitetit, ordinerllëkut, spiunllëkut, hajdutllëkut – Azem Hajdari.
Ministëri i Numizmatikës atdhetare patriotike – Artan Lame.
Iniciator, flamurtar, pionier, maratonomak, theror, dëshmor, i përhapjes së arsimit, kulturës, Artit, Letërsisë – Henri Çili.
Ministër i inteligjencës artificiale, urrejtësi congenital i saj – kaurri Aurel Plasari.
Ministër i Rënkimeve, Psherëtimave, Ofshamave, askush më i përshtashëm se madhështori – Piro Kuqi.
Ministër i Antikorrupsionit – Mitat Frashëri.
Ministër i Bejlerllëkut genuin – Rushan Bej Pacomiti.
Ministër i Vigjilencës proletare, nga të parët që prej kësaj vigjilence e pësoi me varje në litar – Hamit Matjani.
Ministër i Kulturës dhe Trashëgimisë Artistike – Karavidh Kacapidhi.
Ministër i operacioneve plastike, goja pridh, pridhi gojë, surrati allçi, bytha llastik – njëri nga të dy, Paris Pordha ose London Kaka.
Ministreshë e Tranzicionit, Moralit, Mallit për Gjyshen, fenomenalja filozofe poliglote që po tund dheun e po gris qiellin – Lea Ypi.
Ministër i Antikomunizmit – Uran Butka ose Çelo Hoxha, dhe pak e kanë, meritojnë më tepër.
Ministër i Pilafit me mish e raki – Pali Miska ose Rita Marko.
Ministër i Intrigave dhe torturave – kurvi ose Kadri Hazbiu.
Zëvendësministrat dhe drejtorët e qeverisë që na duhet do jenë shumica diversanta. Kusuri do jenë pisanjosa nga Uzina e traktorave, Ferma Gjergj Dimitrov, Azotiku i Fierit, Superfosfati i Laçit.

OPINION

Liria e fjalës e rrezikuar nga media

Nga Lutfi Dervishi

Dita e lirisë së shtypit mbetet një ditë e mirë për të parë hijet që kërcënojnë gazetarinë jo nga jashtë, por nga brenda.

Një nga kërcënimet më të mëdha që kanoset sot është deformimi i prioriteteve gazetareske.

Në vend të përqëndrimit te raportimi objektiv dhe gazetaria hulumtuese, sot në modë është opinioni dhe sensacioni të cilat kanë kultivuar prej vitesh një publik që është edukuar të shfaqë përherë interes për to.

Kjo rokadë ka bërë që miti për gazetarinë këtu të mos jetë te reporteri/gazetari por opinionisti/analisti. (Një gazetar raporton atë që ka parë dhe verifikuar dhe atë që ka ndodhur në terren. Një analist/opinionist flet çfarë ndodh në kokën e tij që mund të jetë edhe krejt boshe.)

Propaganda e veshur si lajm është tjetër kërcënim për gazetarinë.

Është fakt se politikanët dhe qeveritarët tashmë raportojnë vetë nga vendngjarjet, shpejt dhe bukur, njëjtë si në filma.
Madje raportojnë edhe fushatat zgjedhore nga çdo cep i vendit ku përballja e tyre me qytetarët pas katër vitesh transmetohet si të ishte një skenë dashurie, malli dhe gëzimi.

Kjo sepse është koha kur politikani bëhet vetë media dhe media e ndihmon duke shpërndarë propagandë.

Një tjetër trend shqetësues është abuzimi me “objektivitetin”. Ai tha, ajo tha.

Një raportim pa asnjë verifikim mjaft që njëri thotë një budallallëk dhe gazetari në vend që të thotë se cila është e vërteta e ndjen se duhet të balancojë duke kërkuar edhe një budallallkë nga ana tjetër.

Beteja sot më shumë se për sasi është për cilësi. Por në kushtet e cunamit informativ besueshmëria e medias cënohet nga “tufa” e “ekspertëve/analistëve” që paraqiten si autoritete në fushat përkatëse.

Në të shumtën e radhës ke të bësh me njerëz që kërkojnë vëmendje përmes medias dhe që atë të cilën thonë sot e harrojnë nesër dhe atë që thonë nesër e kanë thënë pardje.

Në vend që të ofrojnë analiza të informuara dhe të bazuar në fakte, ata shpesh përhapin opinionet personale, në stilin “kështu ma merr mendja mua” .

Në vend të sqarimit mbjellin konfuzion përmes spekullimeve, thashethemeve, dhe keqinformimit. Nuk mbajnë asnjë përgjegjësi dhe mendojnë se “ky popull këtë meriton”..

Ndërsa “Qershia mbi tortë” janë gjobvëniet të paraqitura si gazetari investigative.

Rreziqet që vijnë nga pushtetet e tjera dhe sidomos ai politik ndaj medias janë evidente dhe nuk thua asgjë të re.

Por rënia e besueshmërisë së medias (15%) ka ardhur edhe si pasojë e minimit të profesionit nga brenda.

Pa vendosur autokontrollin, media nuk mund të bëhet e besueshme në misionin për të “kontrolluar” pushtetet e tjera.