Edi Maduro instalohet ne Shqipëri, Evropa të zgjedhë midis Ramës anti-Trump dhe demokracisë

Zgjedhjet në Shqipëri u manipuluan përpara ditës së zgjedhjeve. Makineria e shtetit dhe patronazhistët kishin bërë ndarjen e punës për të frikësuar dhe vënë në lëvizje gjithë administratën publike duke i intimiduar se do të kumbisnin vendin e punës; të blerjes së votës atje ku presioni nuk bënte punë; të ndihmës që do të vinte nga grupet kriminale, të cilët do të vepronin për të mos humbur parajsën e tyre në pastrimin e parave dhe mbajtjen e kontrollit mbi drogën; për bllokimin e veprimtarisë së institucioneve ligj-zbatuese për të mos evidentuar shkeljet në procesin zgjedhor.

Rama doli në këto zgjedhje pa asnjë platformë qeverisëse. I vetmi premtim i tij ishte që do ta integronte Shqipërinë në BE. Një premtim që nuk varej nga ai, për më tepër që standardet e vendit tregonin konsolidimin e narko-shtetit, sesa një përpjekje për një demokraci funksionale dhe shtet të së drejtës në Shqipëri. Ai u shpartallua në opinionin publik Shqiptar dhe u tregua i paaftë dhe pa vizion në studiot televizive, opozitare dhe jo-vetëm, përballë argumenteve të gazetarëve dhe analistëve të shkëlqyer, pa përmendur ndonjë rast dhe të talljeve për të ashtuquajturin projekt të tij evropian. Paradoksi i këtyre zgjedhjeve ishte që populli nuk zgjodhi programin e detajuar të opozitës Shqiptare për rritjen e mirëqenies së tij por “pëlqeu” bufonin propagandistik; nuk pëlqeu rritjen e menjëhershme të pensioneve që do realizohej 100 ditët e para nga opozita, por zgjodhi premtimet e Ramës që këto rritje do bëheshin në fund të mandatit të tij; nuk zgjodhi frymën pro-biznes dhe uljen e taksave, por alternativën e Ramës për një shtet që kontrollon gjithçka.

Anti-europianisti më i madh i para pak viteve dhe krijuesi së bashku me Vucic i një Ballkani të Hapur kundër Procesit të Berlinit, u bë pro-evropian nga halli. Europianizmi i tij u evidentua kur nuk arriti dot të blinte influencë politike në Shtetet e Bashkuara të Amerikës. Ai e përdori Evropën si rezultat i refuzimit të Washington-it për shërbimet e tij të korruptuara dhe lidhjet okulte me McGonigal, Deripaska, etj. Dhënia e territoreve shqiptare për “turizëm” më shumë kishte nxitur ndjenjën e përçmimit në botën politike sesa entuziazmin për ata që i përfitonin. Ardhja e strategut LaCivita për menaxhimin e fushatës së PD në Shqipëri dhe deklaratat e tij “ose kukull e Soros ose mik me Shtetet e Bashkuara”, e kanë detyruar Ramën në kërkim të një përkrahje evropiane, që është akoma skeptike nga revolucioni i ideve dhe veprimit të Trump në arenën botërore.

Sot, propaganda e sponsorizuar e Ramës në SHBA dhe Evropë tregon entuziazmin për dështimin e MAGA-s në Shqipëri dhe mospranimin e ideve të Trump në Evropë. Edhe këtë herë ai u përdor nga Sorosianët në luftën ndaj Trump.

Masakra zgjedhore në Shqipëri ka hapur rrugën e instalimit të plotë të regjimit të “Maduros Europian”. Kjo gjë është e papranueshme për popullin Shqiptar dhe në qoftë se nuk reflektohet përpara këtij skandali do ta cojë Shqipërinë drejt një destabiliteti. Dënimi dhe distancimi i Evropës nga kjo maskaradë elektorale është një domosdoshmëri për vetë vlerat evropiane.

Në qoftë se Evropës i duhet të mbajë Edi Ramën për ta kthyer Shqipërinë një burg evropian të emigrantëve, me projekte entuziaste të Melonit dhe laburistit Starmer, kjo është kundër interesave të demokracisë dhe popullit Shqiptar. Ne e refuzojmë këtë farsë politike dhe do të mbetemi besnikë të atyre vlerave evropiane mbi të cilat është ngritur Evropa e Bashkuar.