Edi Rama do të gjejë ndonjë ‘motër’ që…

Deputeti i PD, Belind Këlliçi ka reaguar për zbutjen e masës së sigurisë për ish deputetin e PS, Alqi Bllako duke renditur kallëzimet penale ndaj tij, për të cilat thotë se Edi Rama do të gjejë ndonjë “motër” në gjykatë që t’ia lajë ndërsa duhet të dënohej me 20 vite burg. Sipas Këlliçit, Bllako është bashkëpunëtor i Edi Ramës, dëshmitar që nuk e lënë të pendohet, sepse i kanë bërë një ofertë e cila nuk mund të refuzohet. Deputeti shton se “gjysmë miliard euro nga djersa dhe kursimet e këtij populli, janë kambanë kishe dhe thirrje e ezanit, për çdo shqiptar”.

“Edi Ramës i pëlqen që të harrohen bëmat e tij dhe të çetës, si e gjithë afera e inceneratorëve, por gjysmë miliard euro nga djersa dhe kursimet e këtij populli, janë kambanë kishe dhe thirrje e ezanit, për çdo shqiptar që e do Shqipërinë më shumë se partinë.

Do të listojmë sot kallëzimet penale ndaj të pandehurit Alqi Bllako, ish-deputet i Rilindjes, bashkëpunëtor i Edi Ramës, tani dëshmitar që nuk e lënë të pendohet, sepse i kanë bërë një ofertë e cila nuk mund të refuzohet.

Si më poshtë vijon lista e kallëzimeve penale ndaj zotërisë në fjalë:

• 1. Shpërdorim i Detyrës, parashikuar nga neni 248 i Kodit Penal
• 2. Shkelje të barazisë së pjesëmarrësve në tendera, parashikuar nga neni 258 i Kodit Penal
• 3. “Fshehja e te ardhurave” parashikuar në nenin 180 të Kodit Penal
• 4. “Mospagimi i Taksave”, parashikuar në nenin 181 të Kodit Penal
• 5. “Moskryerja e detyrave nga organet Tatimore”, parashikuar në nenin 181/a të Kodit Penal
• 6. “Përfitim i Paligjshëm i interesave”, parashikuar në nenin 257 të Kodit Penal
• 7. “Korrupsioni pasiv i funksionarëve të Lartë Shtetërorë” ose të Zgjedhurve Vendorë”, parashikuar në nenin 260 të Kodit Penal
• 8. “Pastrimi Produkteve të veprës penale”, parashikuar në nenin 287 të Kodit Penal
• 9. “Moskallëzim Krimi, parashikuar në nenin 300 të Kodit Penal”, tha Këlliçi.

Sipas Këllçit, nëse Bllako do të gjendej fajtor për aferën e inceneratorëve, do të duhej që të dënohej minimalisht me 20 vite burg.

“Këto janë vepra kryer në punë e sipër për të fshehur “veprat” e Rilindjes, tre incenerorë që as ekzistojnë, as djegin dhe as punojnë.

I vetmi tym që del dhe shihet vjen nga Kombinati Metalurgjik “Hajdutët e partisë” ku taksat e shqiptarëve digjen dhe bëhen flori për llogaritë off shore të Edi Ramës dhe bandës së tij.

Tymi i ka dalë edhe skemës së Edi Ramës, që sipas informacioneve tona po përgatit arrestime të reja, me qëllim që të krijohet ideja e ndëshkimeve në rastin konkret, inceneratori i Fierit. Një karrem për publikun, duke kapur peshq të vegjël për të lënë pa ndëshkuar peshkaqenët e vërtetë të kësaj mega vjedhje.

Partia Demokratike, ndërkohë që kërkon mbajtjen përgjegjës para ligjit të të gjithë të përfshirëve, do të jetë në këmbë për të mos lejuar që përgatitësit dhe lejuesit e skemës të rrinë të qetë, dhe aktorët e dorës së tretë të mbajnë të gjithë peshën e aferës. Një drejtësi me regji, është drejtësi e mohuar!”, përfundoi Këlliçi.

Ish-deputeti i Partisë Socialiste Alqi Bllako, u lirua nga qelia me vendim të Gjykatës së Posaçme, pas kërkesës për ndryshim të masës së sigurisë. Gjyqtarja Irena Gjoka caktoi “arrest shtëpie” për ish-deputetin, i cilin tashmë do të ndjekë hetimet e SPAK nga banesa e tij.