Ekzekutimi i Nikulajt/ Një grua ‘tradhëtoi’ ekipin e vrasësve

Gjykata e Lezhës ka caktuar masën e sigurisë ‘arrest me burg’ në mungesë, për gjashtë personat që akuzohen si të përfshirë në vrasjen e biznesmenit Ardian Nikulaj. Ata akuzohen për dy vepra penale, ‘vrasje për gjakmarrje’ e ‘vrasje e kryer në bashkëpunim.’ • Nga ana tjetër, sot vijojnë të zbardhen detaje në lidhje me ngjarjen. Ministri i Drejtësisë Ulsi Manja tha se kanë dërguar letërporosi në Britaninë e Madhe dhe presin përgjigjet për të vijuar me procedura të mëtejshme. • Ka qenë një grua, e afërme e Edmond Haxhias, ajo që ka zbardhur skemën e ekzekutimit të Nikulajt, ngjarje e ndodhur më 19 prill. Kamerat e sigurisë kanë pikasur gjithashtu momentin kur Haxhia ka marrë në aeroport britanikët e portugezin e angazhuar në vrasje. • Në rolin e ekzekutorit ishte portugezi Ruben Saraiva, ndërsa katër britanikë ishin vëzhgues. Ata janë identifikuar si: Harry Simson, Thomas Mithan, Steven Hunt dhe Harriet Bridgeman. I gjithë ekipi menaxhohej nga Edmond Haxhia, djali i dajës i vëllezërve Lestakaj. Këta të fundit janë në gjakmarrje me Nikulajn prej vitit 1997.

LEZHË– Gjykata e Lezhës ka caktuar masën e sigurisë ‘arrest me burg’ në mungesë, për gjashtë personat që akuzohen si të përfshirë në vrasjen e biznesmenit Ardian Nikulaj. Ata akuzohen për dy vepra penale, ‘vrasje për gjakmarrje’ e ‘vrasje e kryer në bashkëpunim.’

Vrasja e Nikulajt u zbardh një ditë më parë. Policia e Shtetit doli me një deklaratë zyrtare ku njoftoi se gjithçka ishte planifikuar nga vëllezërit Lestakaj, me të cilët Nikulaj ishte në hasmëri që prej vitit 1997. Dyshohet se Lestakajt kishin paguar një skuadër të huajsh për të ardhur për të kryer vrasjen. Sipas të dhënave të PSH-së, në rolin e ekzekutorit ishte portugezi Ruben Saraiva, ndërsa katër britanikë ishin vëzhgues.

Ata janë identifikuar si: Harry Simson, Thomas Mithan, Steven Hunt dhe Harriet Bridgeman. I gjithë ekipi menaxhohej nga Edmond Haxhia, djali i dajës i vëllezërve Lestakaj. Por, deri më tani asnjë prej të përfshirëve nuk janë arrestuar. Të gjithë janë larguar nga Shqipëria dhe nuk dihet destinacioni i tyre. Nga ana tjetër, vetë vëllezërit Lestakaj ndodhen në Britaninë e Madhe.