Elon Musk: Kemi vendosur çipin e parë nga “Neurolink” te truri i një njeriu

Miliarderi i Teknologjisë, Elon Musk ka njoftuar se kompania e tij Neuralink ka implantuar me sukses një nga çipat e saj të trurit me valë te një njeri për herë të parë.

Qëllimi i kompanisë është të lidhë trurin e njeriut me kompjuterët për të ndihmuar në trajtimin e kushteve komplekse neurologjike.

“Rezultatet fillestare zbuluan pika premtuese të neuroneve ose impulse nervore dhe pacienti po shërohet”, tha Musk.

Një numër i kompanive rivale kanë implantuar tashmë pajisje të ngjashme. Kompanisë së Musk iu dha leja për të testuar çipin te njerëzit nga FDA në maj, një moment historik pas përpjekjeve të mëparshme për të marrë miratimin.

Kjo dha dritën jeshile për fillimin e studimit gjashtëvjeçar gjatë të cilit një robot po përdoret për të vendosur kirurgjikisht 64 fije fleksibël, më të holla se një fije floku, në një pjesë të trurit që kontrollon “lëvizjet”, sipas Neuralink.

Nëpërmjet një postimi në X, platformën e mediave sociale që ai zotëron, Musk tha se produkti i parë i Neuralink quhet Telepathy.

“Telepatia do të mundësoj kontrollin e telefonit apo kompjuterit tuaj, dhe pothuajse çdo pajisje, vetëm duke menduar. Përdoruesit fillestarë do të jenë ata që kanë humbur përdorimin e gjymtyrëve të tyre”, theksoi ai.

Ndërsa përfshirja e Musk rrit profilin e Neuralink, ai përballet me rivalë, disa prej të cilëve kanë një histori që daton dy dekada më parë.

Në dy studime të veçanta shkencore të fundit në SHBA, implantet u përdorën për të monitoruar aktivitetin e trurit kur një person përpiqej të fliste, të cilat më pas dekodoheshin për t’i ndihmuar ata të komunikonin.