Elon Musk tallet me mbylljen e hetimeve, kërkon publikimin e ‘listës së qejflinjëve’ të Epstein

Elon Musk thotë se koha e “askush nuk po arrestohet” ka ardhur sërish dhe kjo duket se e shqetëson, duke sjellë në vëmendje faktin se Inteligjenca amerikane dhe Byroja Kombëtare e Hetimit kanë mbyllur çështjen e Jeffrey Epstein.

Sipas agjencive, nuk ekziston një “listë” e Epstein dhe ai është vetëvrarë në burg, ndaj nuk ka më kuptim që hetimet të vijojnë.

Megjithatë, sipas njeriut më të pasur në botë, kjo është thjesht një tallje e radhës e drejtësisë dhe “pedofilët” e përfshirë në listën e Epstein duhet të arrestohen.

Madje, ai sërish, kërkon që “lista të bëhet publike”.

Departamenti i Drejtësisë i SHBA-ve dhe Byroja Kombëtare e Hetimit (FBI) kanë arritur në përfundimin se Jeffrey Epstein nuk kishte “listë klientësh” dhe vdiq nga vetëvrasja, sipas një memoje të siguruar nga Axios.

Hetuesit nuk gjetën prova që Epstein shantazhoi politikanë ose biznesmenë të fuqishëm. Memoja thotë se i vetmi person që përballet me akuza është Ghislaine Maxwell, e cila tashmë po vuan një dënim me 20 vjet burg.

FBI-ja gjithashtu publikoi pamje nga kamerat e sigurisë nga nata e vdekjes së Epstein, duke treguar se askush nuk hyri në qelinë e tij.

DOJ dhe FBI vendosën të mos zbulojnë materiale të mëtejshme në lidhje me rastin, duke përmendur se shumica e dosjeve përfshijnë abuzim seksual të fëmijëve, të dhëna private të viktimave dhe informacione që mund të çojnë në “akuza të pabaza”.

Gjatë një përplasjeje me presidentin amerikan Donald Trump, Elon Musk pretendoi se emri i Trump ishte në “listën e klientëve” të Epstein – një deklaratë që ai më vonë e fshiu, duke pranuar se kishte “shkuar shumë larg”.

Jeffrey Epstein u akuzua për trafikim qeniesh njerëzore dhe shfrytëzim seksual të të miturve në ishullin e tij privat. Në vitin 2019, provat kryesore — duke përfshirë CD dhe hard disqe të sekuestruara nga FBI — u zhdukën. Ai vdiq në qelinë e tij të burgut para se të jepte dëshmi.