ENDERR E LARGET/ Moment kritik për Kosovën/ Paralajmërimi i ashpër i Donald Trump

Analisti Baton Haxhiu ka thene se qendrimet e kryeministrit te KOSOVES Albin Kurti, megjithëse të udhëhequra nga motive politike të brendshme, janë interpretuar si mungesë vlerësimi për partneritetin strategjik me SHBA-të. Por, gabimet e tij nuk duhet të jenë arsye për penalizimin e popullit të Kosovës dhe për tërheqjen e mbështetjes amerikane.

“Kosova është një histori suksesi për SHBA-të dhe NATO-n. Është një rast ku ndërhyrja ndërkombëtare çoi në ndalimin e gjenocidit dhe krijimin e një shteti të ri, i cili pavarësisht sfidave, ka bërë hapa të rëndësishëm përpara. Një largim nga ky angazhim nuk do të dëmtonte vetëm Kosovën, por do të dërgonte një mesazh të rrezikshëm për aleatët dhe kundërshtarët e SHBA-së: se angazhimet amerikane nuk janë të përhershme dhe se stabiliteti ndërkombëtar mund të sakrifikohet për interesa të brendshme. Në këtë moment kritik, është e rëndësishme që Kosova të tregojë maturi politike dhe të ndërtojë ura të forta komunikimi me SHBA-të dhe NATO-n” – ka shkruar Haxhiu. Sipas tij gjithashtu “Evropa, nga ana tjetër, duhet të rrisë investimet e saj në mbrojtje dhe të tregojë se është e gatshme të marrë më shumë përgjegjësi për sigurinë rajonale, përndryshe, një rajon i paqëndrueshëm si Ballkani mund të bëhet sërish burim konflikti, duke rrezikuar jo vetëm stabilitetin e tij, por edhe të gjithë kontinentit”

“Fjalimi i Donald Trump mund të duket si një thirrje për paqe dhe rikthim te prioritetet e brendshme, por për Kosovën dhe Ballkanin, ai është një paralajmërim i ashpër. Fundi i “luftërave të pafundme” nuk duhet të nënkuptojë fundin e angazhimit amerikan për paqen dhe stabilitetin. Përndryshe, historia ka treguar se boshllëqet e krijuara nga tërheqja e fuqive të mëdha mbushen gjithmonë nga ata që e shohin konfliktin si mundësi. Për Kosovën, ajo që sot shihet si një garanci e paprekshme mund të kthehet nesër në një ëndërr të largët” – ka theksuar Baton Haxhiu.