‘Është proces teknik…’/ Zyra e Macron sqaron qëndrimin për çështjen e vizave të Kosovës

Zyra e Presidentit të Francës, Emmanuel Macron, ka thënë se çështja e liberalizimit të vizave për Kosovën mbetet ende një mundësi e hapur. Kjo deklaratë ka ardhur pasi presidenti Macron tha sot në Tiranë se Franca mund ta pezullojë procesin e liberalizimit të vizave për Kosovës. Në një përgjigje për Abc News, zyra e Macron u shpreh se, ky është një proces teknik, që duhet të diskutohet me partnerët evropianë.

“Presidenti ka folur për tensionet mes Serbisë dhe Kosovës. Ai tha se cilat ishin kërkesat tona. Në këtë kontekst dhe duke marrë parasysh bllokadën e Prishtinës, presidenti vlerësoi se çështja e liberalizimit të vizave mbetet e hapur. Për më tepër, është një proces teknik dhe një diskutim që duhet bërë me partnerët tanë evropianë”, thuhet në përgjigjen e kabinetit të Macron.