FOTO/ Goditet rrjeti kriminal i pastrimit të parave, mes të arrestuarve edhe shqiptarë

Një hetim i udhëhequr nga Italia, ka zbuluar një sistem të ndërlikuar të përdorur për pastrimin e parave të drogës për rrjetet kriminale. Mëngjesin e sotëm, autoritetet në Itali dhe Spanjë arrestuan 33 të dyshuar, në një aksion të koordinuar kundër një rrjeti kriminal global të pastrimit të parave të drogës.

Autorët e dyshuar, të cilët janë me kombësi italiane, shqiptare, kolumbiane, marokene dhe siriane, kishin krijuar një rrjet ndërkombëtar, për të pastruar paratë e pista. Rrjeti kriminal ofroi një shërbim profesional për të fshehur origjinën e të ardhurave, të krijuara nga trafiku i paligjshëm i drogës nga Amerika e Jugut, raporton Europol.

Me mbështetjen e Europol dhe Eurojust, specialistë të pastrimit të parave nga Guardia di Finanza italiane, zbuluan një rrjet kompanish elektronike të vendosura në mbarë globin dhe sekuestruan 18.5 milionë euro asete. Struktura e ndërlikuar përdorte kompani në vende të tilla si Kina, Turqia dhe Shtetet e Bashkuara të Amerikës. Ky rrjet komplekse kompanish lejoi që krimi i organizuar të maskonte burimin, vendndodhjen, pronësinë, kontrollin, origjinën dhe destinacionin e fondeve të përfituara në mënyrë të paligjshme dhe të shmangte zbulimin e tyre.

Pastrimi i parave i bazuar në tregti

Për të pastruar fitimet nga droga të krijuara në Evropë, kriminelët e arrestuar ofruan një shërbim të pastrimit të parave të bazuara në tregti të njohur si “Black Market Pesos Exchange”. Ky proces zvogëlon rrezikun e humbjes së parave përmes konfiskimeve dhe lejon akses më të shpejtë në fonde. Prodhuesit e drogës do t’u jepnin drogë blerësve italianë, si një formë kredie. Fitimet e krijuara nga shitja e drogës në Evropë u morën më pas nga ndërmjetësit, u futën në kompani dhe u përdorën për porositjen e mallrave të tilla si telefonat celularë nga Kina. Këto mallra u dërguan më pas në Shtetet e Bashkuara dhe u transportuan më tej në Kolumbi, ku u ofruan në treg. Me t’u shitur, kartelet si Grupo Armado Organizado morën paratë e gatshme dhe kështu pagesën e tyre të fshehtë për drogën që u jepeshin shitësve evropianë.