Gazeta e Presidentit serb: Meloni akull me Ramën, Vuçiçin e sheh si Zot, i do meshkujt seriozë dhe liderë

Një artikull nga Gazeta “Informer”, medium që e mbështet në mënyrë të pabesueshme Presidentin e Serbisë Aleksandar Vuçiq, ka bërë një krahasim mbi ‘preferencat personale’ të kryeministres italiane Giorgia Meloni.

Portali serb ka publikuar një “analizë” të ngarkuar me spekulime e fantazi, duke e portretizuar Melonin si të “magjepsur” pas liderit serb, ndërsa ndaj Edi Ramës aty thuhet se ajo shfaqet e “akullt dhe përbuzëse”.

Gjithçka nisi nga një moment në samitin e fundit në Tiranë, ku kryeministri shqiptar Edi Rama, për ta përshëndetur në mënyrë teatrale Melonin, gjunjëzohet dhe bashkon duart para saj.

Sipas medias serbe, Meloni është “neveritur” nga veprimi i Ramës, ndërsa në një vijë tërësisht të kundërt, ajo “shkëlqen” sa herë ndodhet pranë Aleksandar Vuçiqit. “Energjike, buzëqeshëse dhe me shikim të thellë dashurie”, thuhet në artikull.

Artikulli përmbyllet me shkrimin: “Meloni i do meshkujt e vendosur, seriozë dhe liderë të vërtetë. Dhe të tillë ka më shumë në Serbi.”