Gjermania shqyrton mënyra për të bllokuar blerjen e tubacionit rus Nord Stream

Gjermania po shqyrton ndryshimin e ligjit të saj të tregtisë së jashtme për të bllokuar marrjen në kontroll të kompanisë që operon tubacionet Nord Stream 2. Siç tregon një dokument i publikuar sot, Berlini ka nisur përpjekjet për të parandaluar rifillimin e importeve të gazit rus. Për dekada të tëra, Gjermania mbështetej te gazi i lirë rus, por pas shpërthimit të luftës në Ukrainë, ajo po kërkon alternativa.

Kancelari gjerman, Friedrich Merz ka thënë se do të sigurojë që tubacioni Nord Stream 2, të cilin vendi dikur e mbështeste, të mos vihet në funksion, por për momentin vendi nuk ka mjete ligjore për të parandaluar shitjen e aseteve, të cilat i përkasin gjigantit rus Gazprom.

Sistemi i tubacionit Nord Stream përfshin dy tubacione binjake që kalojnë Detin Baltik dhe përfundojnë në Gjermani dhe ishte rruga më e madhe për gazin natyror rus për të hyrë në Evropë, i aftë të furnizonte 110 miliardë metra kub gaz në vit.

Linja e dytë e gazsjellësit, Nord Stream 2, u përfundua në vitin 2021. Ai nuk u bë kurrë funksional për shkak të përkeqësimit të marrëdhënieve midis Rusisë dhe Perëndimit dhe u godit nga shpërthime në vitin 2022, të cilat lanë njërën nga dy linjat e tij të paprekura.

Kompania zvicerane e menaxhimit të Nord Stream 2 ka kaluar nëpër procedura falimentimi që mund të çojnë në shitje të aseteve. Në nëntor, Wall Street Journal raportoi se investitori amerikan Stephen P. Lynch po përpiqej të blinte Nord Stream 2, gjë që qeveria ruse e mohoi.

Në përgjigje të një pyetjeje të ngritur në parlament më 24 qershor, Ministria Gjermane e Ekonomisë tha se qeveria po diskutonte një ndryshim të mundshëm gjatë kësaj periudhe legjislative në Aktin e Tregtisë së Jashtme, pasi aktualisht nuk parashikon ndonjë rishikim të investimit në rast të një blerjeje.

Ish-zëvendësministri i ekonomisë dhe deputeti i Partisë së Gjelbër, Michael Kellner, tha se qeveria duhet ta mbyllë këtë boshllëk ligjor.

“Tubacionet në Gjermani apo Evropë nuk u përkasin kompanive ruse apo amerikane”, tha ai.