Gjithmonë ka një POR/ Von Crammon për vendimin për dinarin

Eurodeputetja dhe njëherazi raportuesja për Kosovën në Parlamentin Evropian, Viola von Crammon, ka thënë se në parim vendimi për përdorimin e dinarit apo të ndonjë monedhe tjetër është absolutisht legjitim dhe nuk duhet kritikuar. Por, sipas saj vendimi aktual për ndalimin e dinarit serb erdhi shumë papritur dhe nevojiten më shumë informacione dhe një periudhë tranzicioni.

“Sipas Kushtetutës së Kosovës, euro është valuta e vetme në Republikën e Kosovës. Pra, në parim, vendimi për përdorimin e dinarit apo të ndonjë monedhe tjetër është absolutisht legjitim dhe nuk duhet kritikuar. Ai duhet të synojë të sigurojë kontrollet e duhura financiare për të shmangur krimet financiare, pastrimin e parave, financimin e terrorizmit, etj. Megjithatë, vendimi aktual për ndalimin e dinarit serb erdhi shumë papritur. Ajo që duhej nga këndvështrimi ynë është komunikimi i duhur, më shumë informacion dhe një periudhë tranzicioni” – ka deklaruar Cramon

Ajo gjithashtu ka thënë se reagimet e miqve dhe partnerëve ndërkombëtarë të Kosovës janë shqetësuese pasi këto masa mund të kenë një potencial përshkallëzimi.

“Në të vërtetë, disa çështje duhet të zgjidhen përpara hyrjes në fuqi të ndalimit, të cilat nga këndvështrimi im duket se nuk janë zgjidhur ende, kështu që vendet e QUINT-it kanë kërkuar ndalimin e zbatimit të vendimit për të lejuar këtë punë të kryhet. Shumë njerëz do të mbeteshin pa të ardhura të konsiderueshme, pasi që qeveria e Kosovës nuk ka ndarë fonde shtesë për të zëvendësuar këto pagesa për qytetarët e saj. Reagimet e miqve dhe partnerëve ndërkombëtarë të Kosovës janë shqetësuese pasi këto masa mund të kenë një potencial përshkallëzimi, por edhe të rrezikojnë jetesën e qytetarëve të Kosovës nga të cilët shumë jetojnë në pragun e  varfërisë” – ka thënë eurodeputetja.

DASH-i i bëri thirrje Kosovës ta shtyjë zbatimin e këtij vendimi “menjëherë”, derisa, siç tha, të vendosen procedura të kënaqshme në përputhje me standardet evropiane dhe popullata të jetë edukuar mjaftueshëm se si do të vazhdojë periudha e tranzicionit.

Ndërkohë, Bashkimi Evropian i ka bërë thirrje Kosovës që të ofrojë periudhë të gjatë tranzicioni për largimin nga përdorimi të dinarit serb.