Gustavo Petro i druhet një sulmi ushtarak amerikan

Presidenti i Kolumbisë, Gustavo Petro, i ka thënë BBC-së se beson se tashmë ekziston një “kërcënim real” për veprim ushtarak të Shteteve të Bashkuara kundër Kolumbisë.

Petro deklaroi se SHBA-të po i trajtojnë vendet e tjera si pjesë të një “perandorie” amerikane. Këto deklarata vijnë pasi presidenti amerikan Donald Trump ka kërcënuar Kolumbinë me veprim ushtarak.

Sipas Petros, SHBA-të rrezikojnë të shndërrohen nga një vend që “dominon botën” në një vend “të izoluar nga bota”.

Pas goditjeve amerikane në Venezuelë dhe kapjes së Nicolás Maduros, presidenti amerikan Donald Trump deklaroi se një operacion ushtarak që synon Kolumbinë “tingëllon mirë”. Trump i ka thënë gjithashtu në mënyrë të përsëritur Petros që “të ruajë shpinën”, komente që presidenti kolumbian i ka dënuar ashpër.

Trump dhe Petro zhvilluan një bisedë telefonike të mërkurën në mbrëmje, pas së cilës Trump deklaroi se do të takonte homologun e tij kolumbian në Shtëpinë e Bardhë në një të ardhme të afërt. Në një postim në platformën e tij Truth Social, Trump e përshkroi bisedën si një “nder të madh”. Një zyrtar kolumbian tha se biseda kishte reflektuar një ndryshim 180 gradë në retorikën e të dyja palëve.

Megjithatë, të enjten toni i Petros sugjeroi se marrëdhëniet nuk ishin përmirësuar ndjeshëm.

Ai i tha BBC-së se telefonata zgjati pak më pak se një orë dhe se “pjesën më të madhe e kam folur unë”, duke u përqendruar te trafiku i drogës në Kolumbi, situata në Venezuelë dhe zhvillimet në Amerikën Latine në raport me SHBA-të.

Petro kritikoi ashpër politikat e fundit amerikane të emigracionit, duke thënë se agjentët e ICE-it po sillen si “brigada naziste”. Trump ka fajësuar shpesh emigracionin për krimin dhe trafikun e drogës në SHBA, duke e përdorur këtë argument për të justifikuar operacione të gjera policore dhe duke akuzuar vende si Kolumbia dhe Venezuela se nuk po bëjnë mjaftueshëm për të luftuar trafikun e drogës.

Që nga rikthimi i tij në Shtëpinë e Bardhë, Trump ka dërguar agjentë të ICE-it në qytete të ndryshme të SHBA-ve. Administrata deklaron se nga 20 janari deri më 10 dhjetor 2025 janë deportuar 605 mijë persona, ndërsa 1.9 milionë emigrantë janë “vetë-deportuar” pas një fushate agresive ndërgjegjësimi.

Sipas të dhënave të Universitetit Syracuse, rreth 65 mijë persona ndodheshin në qendrat e ndalimit të ICE-it në fund të nëntorit 2025.

Këtë javë, një agjent amerikan i emigracionit qëlloi për vdekje një shtetase amerikane 37-vjeçare në Minneapolis, ngjarje që shkaktoi protesta. Zyrtarët federalë thanë se ajo kishte tentuar të përplaste agjentët me makinë, por kryetari i bashkisë së qytetit e cilësoi veprimin e agjentit si të pamatur.

Petro tha se ICE ka arritur në pikën ku “jo vetëm përndjek latinët në rrugë, por edhe vret shtetas amerikanë”.

Ai shtoi se, nëse kjo vazhdon, SHBA-të do të përfundojnë të izoluar: “Një perandori nuk ndërtohet duke u izoluar nga bota”.

Presidenti kolumbian deklaroi se për dekada me radhë SHBA-të kanë trajtuar qeveritë e Amerikës Latine si pjesë të një “perandorie”, pa marrë parasysh ligjin ndërkombëtar.

Pas komenteve të Trump për veprim ushtarak ndaj Kolumbisë, në vend u organizuan protesta në emër të sovranitetit dhe demokracisë. Petro i tha BBC-së se këto deklarata përbëjnë një “kërcënim real”, duke kujtuar humbjen historike të territoreve kolumbiane, si Panamaja.

I pyetur se si do të mbrohej Kolumbia në rast të një sulmi amerikan, Petro tha se do të preferonte dialogun, por shtoi: “Historia e Kolumbisë tregon se si i kemi përballuar ushtritë e mëdha – me masat, malet dhe xhunglat tona”.

Ai konfirmoi gjithashtu se kishte folur me Delcy Rodríguez, presidenten e përkohshme të Venezuelës, të cilën e ka ftuar në Kolumbi.

Kolumbia është prodhuesi më i madh në botë i kokainës dhe një nyjë kyçe e trafikut global të drogës, por gjithashtu ka rezerva të konsiderueshme nafte dhe minerale të çmuara.

Trump e ka quajtur Petron “një njeri të sëmurë që pëlqen të prodhojë kokainë dhe ta shesë në SHBA”, akuza që Petro i ka mohuar, duke theksuar se prej 20 vitesh ka luftuar kartelet e drogës, me koston e internimit të familjes së tij.

Petro, ish-gueril, ka ndjekur një strategji të quajtur “paqja totale”, e cila synon dialogun me grupet e armatosura. Kritikët thonë se kjo qasje ka qenë e butë, ndërsa prodhimi i kokainës ka arritur nivele rekord.

Presidenti u përgjigj se rritja e kultivimit të kokainës po ngadalësohet dhe se po ndiqen dy qasje njëkohësisht: dialog për paqe dhe ofensivë ushtarake kundër atyre që refuzojnë paqen.