Heshtja që vret/ Shkrimtari serb akuzon Vuçiçin

Gazetari serb Radomir Dimić ka thënë se nuk është serbe të heshtësh në përvjetorin e dytë të luftës së agresionit të Rusisë në Ukrainë, duke pasur parasysh se Serbia zyrtare nuk ka bërë asnjë reagim në lidhje me pushtimin në përvjetorin e luftës. Ai gjithashtu ka apeluar për kujdes, pasi konsideron se një agresion i ngjashëm mund të ndodhë edhe në Kosovë.

Në një artikull, Dimić tha se Ukraina ka nevojë për mbështetje më të mirë dhe më të gjerë sot më shumë se kurrë, ndërsa theksoi se sanksionet e reja kundër Rusisë nuk janë të mjaftueshme kundër regjimit të presidentit rus Vladimir Putin.

“Nuk është serbe të heshtësh në përvjetorin e dytë të luftës së agresionit në Ukrainë, nuk është për shkak të masakrave në mes të Evropës, të shkaktuara nga lufta e tmerrshme vdekjeprurëse, e cila si një vrimë e zezë gëlltit jetën e njerëzve. 10.000 civilë, burra, gra dhe fëmijë kanë vdekur deri më tani, dhe sa e sa njerëz kanë lënë shtëpitë e tyre…Në ditën e fillimit të agresionit rus kundër Ukrainës, ne kemi nevojë për solidaritet evropian, solidaritet njerëzor” –  ka shkruar ai ndër të tjera, duke vene në dukje gjithashtu edhe rrezikun që i kanoset Ballkanit nga ndikimi rus.

“Po ashtu, ekziston rreziku nga ndikimi rus që po rritet në Ballkan dhe ka shumë mundësi që i njëjti model si në Ukrainë të përdoret edhe në rajonin tonë, në Kosovë. Dhe për këtë duhet të tregojmë kujdes të veçantë”, ka shkruar Radomir Dimić.

Kujtojmë se Serbia nuk ka vendosur sanksione ndaj Rusisë për agresionin ushtarak në Ukrainë, përkundrazi, dy vendet vetëm kanë zgjeruar bashkëpunimin mes tyre.