Isa Mustafa: Drafti i BIG FIVE, ndal të keqen më të madhe

Ish-kryeministri i Kosovës dhe njeriu që për një kohë ka drejtuar Lidhjen Demokratike të Kosovës, Isa Mustafa, ka thënë se zvarritja në procesin e dialogut ka pasur kosto politike për Kosovën. Ai tha se kryeministri Albin Kurti dhe presidentja Vjosa Osmani nga krekosja ndaj ndërkombëtarëve për sovranitet në Veri, mbetën vetëm me kartën e sigurisë, ndërkohë që shtoi se nga dialogu për njohje reciproke, është degraduar në de-eskalim dhe Asociacion.Ish-kryeministri Mustafa ka thënë gjithashtu se çdo vonesë shkon në favor të Serbisë dhe në dëm të Kosovës. “Zgjatimi i dialogut, koncentrimi në tema populliste dhe injorimi i partnerëve strategjikë, ishin me kosto politike për Kosovën. Qeveria dhe presidentja nga krekosjet ndaj amerikanëve dhe evropianëve me temën e sovranitetit tani, pas agresionit serb në veri të vendit, iu mbeti vetëm karta e sigurisë. Nga zgjidhja përfundimtare me njohje zbritën në zgjidhje për deeskalim, ndërkaq Asociacionit i shtuan vetëmenaxhimin serb dhe statusin shtetëror të kishës ortodokse serbe” – ka thënë Mustafa. Marrë parasysh dëmin e shkaktuar nga vonesat, Mustafa thotë se pranimi i dokumentit evropian për Asociacionin, që sipas tij, iu la në derë Kurtit, është një hap që ndal të keqën më të madhe. Ish-kryeministri thotë se tani është e rëndësishme që të shfrytëzohen elementet nga marrëveshjet paraprake, si ai për verifikim në Gjykatë Kushtetuese dhe të përdoren të gjithë mekanizmat shtetëror për ambientimin e Asociacionit brenda sistemit kushtetues të Kosovës. Mustafa tha gjithashtu se tani nuk ia vlen marrja me Kurtin dhe sipas tij është e rëndësishme që të sigurohet bashkëpunim për ta nxjerrë Kosovën nga hendeku ku ka rënë. Kryeministri Albin Kurti dhe presidenti serb Aleksander Vucic gjatë javës në Bruksel janë takuar me liderët e Gjermanisë, Francës dhe Italisë, përfshirë edhe preisdentin e Këshillit të BE, Charles Michel, Përfaqësuesin e Lartë, Josep Borell dhe emisarin Miroslav Lajcak. Borell pas takimit ka thënë se as Kurti e as Vucic s’kanë qenë të gatshëm të pranojnë propozimin evropian pa vendosur parakushte, që kanë qenë të papranueshme për palën tjetër. Ndërkohë që kryeministri Albin Kurti dhe presidenti Vucic kanë thënë se janë pajtuar me draftin modern evropian për Asociacionin. Në një komunikatë të përbashkët të Macron, Scholz dhe Meloni, është kërkuar që Kosova të nis themelimin e Asociacionit dhe Serbia ta japë njohjen de-facto. Ata gjithashtu kanë bërë thirrje që të tejkalohen shpejt dallimet në detaje.