Isa Mustafa: Kurti të heq dorë nga marrëzitë

Ish-kryetari i Lidhjes Demokratike të Kosovës dhe ish-kryeministri i Kosovës, Isa Mustafa, ka folur lidhur me deklaratën e zëvëndëskryeministrit Besnik Bislimi të dhënë në “Danas” dhe ku ai pranon që Kosova ka bërë një lëshim të madh në Ohër duke heqë dorë nga njohja formale.

Mustafa ka thënë se synimi kryesor i dialogut Kosovë-Serbi ka qenë arritja e njohjes reciproke, megjithatë u shpreh se nën drejtimin e Kurtit, dialogu është shndërruar një proces menaxhimi krizash.

“Objektivi bazë i dialogut Kosovë – Serbi ka qenë zgjidhja e mosmarrëveshjeve për të arritur njohje reciproke. Me këtë qeveri, dialogu  ka kaluar në trase tjetër, atë të menaxhimit të krizave, të cilat i shkaktojnë të dyja palët për konsum të brendshëm politik” – ka thënë ish-kryeministri, teksa ka shtuar se Qeveria e Kosovës fillimisht bënë veprime populiste, kinse për të shtrirë sovranitetin, veprime të cilat më pas i shesin tek “qytetarët e painformuar”, dhe më pas tërhiqen prej tyre, pas qortimeve dhe sanksioneve ndërkombëtare. Ai theksoi se politika të tilla për Kosovën janë krejtesisht të gabuara dhe jashtë interesave strategjike të shtetit.

Duke folur për Marrëveshjen e Ohrit, Isa Mustafa deklaroi se me pranimin nga ana e qeverisë se është hequr dorë nga njohja formale, dhe duke shtuar mungesën e vullnetit për implementim, kjo është më e rëndë dhe me më shumë pasoja të pa parashikueshme në krahasim me Marrëveshjen e vitit 2013. Sipas tij, Kosova me urgjencë do të duhej të rikthejë sa më shpejtë fokusin e bisedimeve te njohja reciproke dhe të heqë dorë nga marrëzitë e fortifikimit të kryetarëve në ato që ai i quan “kullat e komunave”, dhe ku nuk shkon askush për të marrë shërbime.