Jeff Hovenier flet qartë: Asosacioni në Kosovë, një angazhim që duhet përmbushur

Në një intervistë të fundit me gazetaren Ilva Tare, ish-ambasadori i SHBA-së në Kosovë, Jeff Hovenier, trajtoi çështjet kryesore politike të vendit, përfshirë ndërtimin e qeverisë, zbatimin e Asociacionit të Komunave me Shumicë Serbe dhe rolin e Perëndimit në çështjet e Kosovës.

Ndërsa Kosova përballet me pasiguri në formimin e një qeverie të re, Hovenier theksoi se krijimi i koalicioneve nuk është vetëm çështje vullneti politik dhe aftësie, por edhe një llogaritje numerike. Ai vuri në dukje se një aleancë midis partive opozitare si PDK, LDK dhe AAK, së bashku me përfaqësuesit e komuniteteve është matematikisht e mundshme, por do të ishte një “koalicion shumë i brishtë”.

I pyetur nëse Shtetet e Bashkuara kanë një preferencë për një koalicion të caktuar, Hovenier theksoi se gjatë mandatit të tij, SHBA-ja ishte e gatshme të punonte me çdo “qeveri të zgjedhur në mënyrë demokratike dhe legjitime” për të avancuar pozicionin e Kosovës në skenën ndërkombëtare.

Hovenier përsëriti se Kosova ka detyrim për të zbatuar Asociacionin e Komunave me Shumicë Serbe, një angazhim i marrë në vitin 2013 dhe i konfirmuar sërish në Marrëveshjen Themelore të vitit 2023. Ai u shpreh kundër përpjekjeve për të rinegociuar marrëveshje të reja, duke theksuar se problemi i vërtetë është mungesa e zbatimit.

Hovenier iu përgjigj gjithashtu kritikave se përfshirja e Perëndimit në politikën e Kosovës përbën ndërhyrje, një pretendim i bërë shpesh nga kryeministri Albin Kurti dhe mbështetësit e tij. Ai mohoi që SHBA-ja të ketë vënë ndonjëherë në dyshim sovranitetin e Kosovës, por theksoi se sovraniteti nuk nënkupton shmangien e pasojave për vendimet politike.