Jehona ndërkombëtare e protestës në Tiranë për ish-krerët e UÇK-së

Zëri i protestës në sheshin “Skënderbej” në Tiranë u dëgjua përtej kufijve shqiptarë. Mediat ndërkombëtare si “Associated Press”, “Washington Post”, “The Telegraph” dhe “Anadolu” raportuan për mijëra qytetarë që u bashkuan në kryeqytetin shqiptar për të kërkuar drejtësi për ish-luftëtarët e Ushtrisë Çlirimtare të Kosovës që po përballen me Gjykatën e Hagës.

“Associated Press” shkroi se “mijëra njerëz protestojnë në kryeqytetin e Shqipërisë kundër gjykatës së mbështetur nga BE që ndjek penalisht veteranët e luftës së Kosovës”.

Të premten, mijëra qytetarë dhe figura politike u mblodhën në sheshin “Skënderbej” në Tiranë për të protestuar kundër Gjykatës Speciale në Hagë, ku po gjykohen ish-krerët e Ushtrisë Çlirimtare të Kosovës (UÇK).

Tubuesit kërkuan lirimin e menjëhershëm të ish-krerëve të UÇK-së që po mbahen në paraburgim në Hagë, duke u përmendur se “nuk mund të barazohet lufta çlirimtare me krimet e pushtuesit”. Në shesh u panë shumë flamuj kombëtarë dhe pankarta me mbishkrime “Liri për çlirimtarët” dhe “Drejtësi, jo padrejtësi”.

Protesta në sheshin “Skënderbeu” erdhi pas asaj të organizuar në Hagë të Holandës, ku mijëra qytetarë kërkuan lirimin e ish-krerëve të UÇK-së – Hashim Thaçi, Kadri Veseli, Jakup Krasniqi dhe Rexhep Selimi – në paraburgim që nga nëntori i vitit 2020.