Kosova duhet të lejojë autonomi për serbët, çfarë thotë lajmi i Fox News

Mediumi amerikan, Fox News ka shkruar se Bashkimi Europian e ka paralajmëruar Kosovën dhe Serbinë se do vuajnë pasojat nëse nuk bëjnë paqe. Fox News shkruan gjithashtu për vizitën e presidentes së Komisionit Europian, Ursula von der Leyen në rajon, gjatë së cilës sipas mediumit ajo lëshoi një paralajmërim të ashpër. Von der Leyen tha se Serbia duhet ta njohë ‘de facto’ Kosovën si një komb të pavarur dhe Kosova duhet të lejojë autonomi për serbët etnikë në veri, ku ata përbëjnë shumicën. Kjo do të përmbushte në mënyrë efektive angazhimet e mëparshme të Serbisë dhe Kosovës të negociuara në fillim të këtij viti. “Deklaratat e një përfaqësuesi kaq të lartë politik kanë peshë, megjithatë, ne duhet të shohim ende nëse ato do të bëjnë ndonjë ndryshim,” tha për Fox News, Helena Ivanov, bashkëpunëtore në Shoqërinë Henry Jackson. “Deri më tani, kryeministri i Kosovës Albin Kurti ka qenë shumë i qartë se Asociacioni i Komunave Serbe nuk është në të vërtetë në tryezë dhe Serbia e kishte të qartë se anëtarësimi në OKB për Kosovën është një vijë e kuqe. Si po planifikon saktësisht BE-ja t’u bëjë presion të dy vendeve, mbetet e paqartë” – shtoi Ivanov. Ndërsa 92% e Kosovës janë shqiptarë etnikë, serbët në veri janë shumicë, i mbeten besnikë Beogradit dhe refuzojnë të pranojnë shpalljen e njëanshme të pavarësisë së Kosovës. Krijimi i Asociacionit të Komunave Serbe, një zotim që Kosova e bëri në vitin 2013 si pjesë e Marrëveshjes së Brukselit, ishte projektuar me qëllim që t’i jepte shkallë të konsiderueshme të vetëqeverisjes komunitetit serb në Kosovë. Megjithatë, krijimi i tij është vonuar që kur kryeministri Kurti mori pushtetin.