Kosova në zgjedhje të parakohshme/ PDK: Qeveria po e thellon krizën

Partia Demokratike e Kosovës, ka mbajtur mbledhjen e përbashkët në mes të Kryesisë dhe Grupit Parlamentar ku është diskutuar për situatën aktuale politike në vend dhe koordinimin e agjendave të brendshme politike e legjislative të PDK-së, në fillim të sesionit vjeshtor të Kuvendit të Kosovës.

“Edhe një herë, në vazhdën e keqqeverisjes dhe veprimeve jo të përgjegjshme të Qeverisë, Partia Demokratike e Kosovës shpreh shqetësimin e saj në lidhje me thellimin e krizës politike, ekonomike dhe sociale” –  thuhet në njoftim për media

Po sipas njoftimit, “skandalet dhe aferat” e njëpasnjëshme të kësaj Qeverie, nga arsimi, ekonomia, shëndetësia, drejtësia e deri te diplomacia, “po përkeqësojnë çdo ditë mirëqenien e qytetarëve dhe pozicionin e shtetit të Kosovës. Për PDK-në, kjo Qeveri tashmë e ka humbur çdo kredibilitet dhe nevoja për t’u rikthyer tek qytetarët, përmes zgjedhjeve të parakohshme, është e domosdoshme.

Po ashtu në njoftim thuhet se PDK-ja përmes të gjitha organeve dhe zyrtarëve të saj, në të gjitha platformat e posaçërisht në Kuvendin e Kosovës, mbetet e angazhuar që të mbrojë ligjshmërinë, interesin e shtetit dhe të qytetarëve.