“Qëndrimi i presidentit serb Aleksandër Vuçiç në Kombet e Bashkuara në Nju Jork do të mbetet i regjistruar në analet diplomatike për serinë e skandaleve që ai krijoi me fjalorin e tij jodiplomatik.

Askënd nuk kursyer, të madhe e të vogël, dhe të gjitha këto teksa pritet votimi në OKB për Rezolutën për Srebrenicën, si dhe votimi në Këshillin e Evropës për pranimin e Kosovës në atë organizatë.

Vuçiç mendon se me kolegët e tij të huaj mund të sillet ashtu siç sillet në Serbi ndaj nënshtetasve të tij, te cilët I quan si do, por pa I hyrë asnjë gjemb në këmbë. Në shoqëritë demokratike kjo nuk është e mundur, por të paktën do kishte pasoja: – kështu janë shprehur për median opozitare serbe ‘Danas’, analistë e diplomatë.

E fundit në serinë e skandaleve është deklarata e Vuçiçit, ku ai I quajti  sllovenët “të neveritshëm” dhe që shkaktoi reagimin e Ministrisë së Punëve të Jashtme të vendit fqinj, si dhe të kryeministrit slloven Robert Golob.

Për të gjitha këto, presidenti i Serbisë është dashur t’u kërkojë falje qytetarëve sllovenë, me një “por”. Ai refuzoi t’u kërkonte falje politikanëve sllovenë dhe për këtë arsye i acaroi më tej marrëdhëniet me Slloveninë.

Pas deklaratës fyese, Ministria e Punëve të Jashtme e Sllovenisë ftoi për sqarim të ngarkuarin me punë në ambasadën e Serbisë në Lubjanë. Ministrja e Punëve të Jashtme dhe eurodeputetja Tanja Fajon, i quajti fyese dhe të papranueshme fjalët e presidentit serb Aleksandër Vuçiç.

Nga ana tjetër, ka reaguar edhe kryeministri slloven Robert Golob, i cili ka theksuar se Vuçiç ka përdorur shprehje jashtëzakonisht fyese që nuk i përkasin presidentëve të shteteve, e aq më pak marrëdhënieve miqësore mes popullit slloven dhe atij serb.
Dhe më pas erdhi apologjia e Presidentit të Serbisë për opinionin slloven, për shkak të deklaratës nga Nju Jorku se “sllovenët ishin më të neveritshmit”.

“Nëse kam ofenduar dikë, dua t’i kërkoj falje gjithë publikut dhe popullit të Sllovenisë, por në të njëjtën kohë them se nuk do t’u kërkoj falje politikanëve sllovenë sepse ata udhëheqin një politikë të neveritshme ndaj Serbisë dhe popullit serb” – deklaroi Vucic dhe ftoi kryeministren dhe presidentin e Sllovenisë për një vizitë në Beograd, siç tha ai,  për të “kërkuar edhe një herë falje nëse është e nevojshme”.

Srećko Gjukić, diplomat karriere, tha per median serbe se skandali me sllovenët është aq i madh sa presidentit i Serbisë iu desh t’i kërkonte falje “popullit slloven, por jo politikanëve të tyre” (dhe po flasim për diplomatët), sikur ata politikanë nuk janë zgjedhur nga populli slloven, por nga dikush tjetër

Bashkëbiseduesi i ‘Danas’ gjithashtu kujtoi se Sllovenia nuk është Eldorado e Beogradit që dikush të sillet në mënyrë të papranueshme si në “tokën serbe”.

“Skandali që u prodhua kësaj radhe, në nivelin më të lartë të palës serbe, është vetëm i fundit në një listë të tërë “keqkuptimesh” me sllovenët. Jo shumë kohë më parë, sllovenët nuk e miratuan kandidatin serb për ambasador, Zoran Gjorgjeviç. Tanja Fajon, Ministre e Punëve të Jashtme të Sllovenisë, në kohën kur ishte kryetare e komisionit të Parlamentit Evropian, ishte në shënjestër të vazhdueshme të sulmeve nga kurora e Beogradit

për shkak të deklaratave të saj që i bënin thirrje qeverisë serbe të respektonte vlerat evropiane dhe standardet e demokracisë, politikës së jashtme, medias etj” –  kujtoi Gjukiç duke shtuar se për fat të keq, problemi me Slloveninë nuk është një rast i izoluar…………..

“Jam krenar për luftën që Serbia po bën në OKB” –  ka deklaruar presidenti Aleksander Vuçiç, i cili me një ekip prej 25 personash, plus 100 persona nga misioni rus në Kombet e Bashkuara, dëshiron të ndalojë miratimin e Rezolutës për gjenocidin e kryer në Srebrenicë në vitin 1995.

“Por do të ishte shumë më mirë nëse ai do të ishte përpjekur të ndalonte gjenocidin kur ndodhi, teksa bëri thirrje për vrasjen e “100 myslimanëve për çdo serb të vrarë” –  shkruan Ivica Puljiç për Al Jazeera, duke shtuar se Ndoshta mund të kishte bërë diçka si ministër i propagandës në qeverinë e Millosheviçit dhe si anëtar i Partisë Radikale Serbe”

29 vjet më vonë, tani radikal serb në moshë të mesme dhe president i Serbisë, Vuçiç po përpiqet të përdorë gjakun e të vrarëve në gjenocid për të mbledhur “botën serbe” dhe për të ndalur atë që nuk mund të ndalet – të vërtetën.

Vuçiç madje shkarkoi ambasadorin e mëparshëm të Serbisë në OKB, Nemanja Stevanoviç, sepse ai e zbuloi vonë se çfarë po thurrnin “diplomatët boshnjakë” në organizatën botërore – “se po përgatitnin një rezolutë që do t’i etiketonte serbët si gjenocidalë”.

Vuçiq e di shumë mirë se kjo nuk është e vërtetë, sepse asgjë serbe apo serbo-boshnjake nuk përmendet askund në draft rezolutën për Srebrenicën.

Teksti bën thirrje për vendosjen e Ditës së Përkujtimit për Srebrenicën, ashtu siç ka një Ditë Përkujtimi për viktimat e gjenocidit në Ruandë. Por, jo… Aleksandçr Vuçiç, në stilin e kryqtarit, viziton misionet diplomatike dhe bashkë me rusët përhap historinë se rezoluta do të çojë në konflikt. Vërtet?

“Rezoluta të ngjashme çuan në pajtim në Afrikën e Jugut dhe Ruandë. Dhe jeta në ato vende vazhdoi pa urrejtje të mbetur vrastare. Pikërisht sepse u tha e vërteta” – eshte shprehur Ivica Puljiç.

Tani e dimë se Asambleja e Përgjithshme e Kombeve të Bashkuara nuk do ta votojë projekt-rezolutën më 2 maj, por disa ditë më vonë. Në fund të fundit, nuk është hera e parë që zhvendoset. A ju kujtohet 27 prilli, për të cilin foli kaq shumë vetë Vuçiç?

Pse ka një ndryshim date? Sepse teksti i rezolutës duhet të “lahet” pak më shumë, të rafinohet, për të marrë parasysh edhe sugjerimet e vendeve të tjera. Asgjë e pazakontë për diplomacinë. Rezoluta do të votohet në një ditë tjetër.

“Vuçiç dhe ambasadori rus Vasilij Nebenzija “shtrydhin duart” me vendet më të dobëta dhe të tilla ka shumë, në të njëjtën mënyrë që shefi i tij Vladimir Putin “përdredh duart” me ukrainasit dhe më pas i vret ata. Kjo është diplomacia e Vuçicit. Forca. Po të ishte politikan i mirë do të kishte diplomatë më të mirë, por nuk ka. Ai ka “nënën” Rusinë – dhe kjo është e gjitha” – deklaroi Puljiç për Al Jazeera duke potencuar_ – “Deri më tani, propozimi per rezolutën ka 22 sponsorë nga të gjitha kontinentet dhe do të ketë më shumë. Bota demokratike mbështet rezolutën, autokrati mbështet ata që ishin xhelatët. Kur keni Korenë e Veriut në anën tuaj, atëherë është e qartë se diçka nuk shkon me ju”

Kosova, një shtet i ri në skenën ndërkombëtare, po përballet me sfida të mëdha në ruajtjen e sovranitetit dhe integritetit territorial në një kontekst global ku interesat e mëdha ndërkombëtare shpesh përplasen.

Botuesi I gazettes Bota Sot, Xhevdet Mazrekaj ka shkruar se “Një prej figurave që shpesh është përfolur në media për ndikimin e tij të gjerë në politikën globale është George Soros, i cili, sipas burimeve të ndryshme, ka një interes të theksuar në resurset e pasura minerare të Kosovës, veçanërisht në minierën e Trepçës”

“Gjatë administratës së Presidentit Biden, Soros është përshkruar si një influencues kyç në politikat e jashtme të SHBA-së, veçanërisht në mbështetjen për çështje që lidhen drejtpërdrejt me Kosovën. Ka spekulime se, nëse Kosova ndahet përmes Asociacionit të komunave me shumicë serbe me ndihmën e ndikimit të Soros, ai mund të përfitojë kontrollin e minierës Trepça si shpërblim nga Vuçiç, duke krijuar një situatë ku interesat ekonomike dhe politikat ndërkombëtare ndërthuren në mënyrë të ndërlikuar. Nëse Donald Trump rikthehet në pushtet, mund të pritet një rifillim i bisedimeve për çështjet që janë lënë pezull gjatë administratës së tij të parë, veçanërisht në lidhje me ndarjen e pjesës veriore të Kosovës”- ka theksuar Mazrekaj

Sipas tij, administrata Trump është njohur për qasjen e saj të drejtpërdrejtë dhe shpesh kontroverse në negociatat ndërkombëtare, dhe një rikthim i tij mund të sjellë ndryshime të mëdha në politikën e jashtme amerikane që do të prekin drejtpërdrejt Kosovën.

“Ndërkohë, qeveria e Shqipërisë, me Edi Ramën në krye, duket se mbështet fuqishëm skenarët për ndarjen e Kosovës, të favorizuar nga kombinimet politike të Soros, Vuçiç dhe Rama, si dhe nga treshja Vuçiç, Grenell dhe Rama.

Kjo mbështetje ka ftohur marrëdhëniet mes qeverisë së Shqipërisë dhe Kosovës, duke shtuar një tjetër dimension të komplikuar në dinamikën rajonale. Serbia vazhdon të bëjë kërcënime të rregullta për nisjen e luftës ndaj Kosovës, duke shtuar presionin ndaj popullatës dhe institucioneve te Kosovës për të bërë lëshime në lidhje me Asociacionin e komunave me shumicë serbe” – ka potencuar botuesi I Bota Sot duke shtuar se “Mediat në Kosovë, të cilat shpesh janë të lidhura me interesat serbe, luajnë një rol kyç në krijimin e një atmosfere të luftës dhe frikës, duke përforcuar perceptimin e një situatë të paqëndrueshme dhe duke lehtësuar manipulimet politike serbe. Financimi i këtyre mediave mbetet i paqartë në shumë raste, duke ngjallur dyshime mbi burimet e tyre të të ardhurave dhe ndikimin e mundshëm në pavarësinë e tyre editoriale. Pavarësisht sfidave dhe ndikimeve të jashtme, Kosova ka treguar një qëndrueshmëri të admirueshme”

“Është jetike që liderët e Kosovës të vazhdojnë të punojnë për të mbrojtur interesat kombëtare dhe të sigurojnë që çdo marrëveshje të ardhshme të respektojë sovranitetin dhe të drejtat e popullit të Kosovës. Ndërsa ndikimet e jashtme do të vazhdojnë të jenë një faktor, qëndrueshmëria dhe përkushtimi për integritetin kombëtar do të jenë kyçe për të siguruar një të ardhme më të sigurt për Kosovën” – ka shkruar ne nje editorial Xhevdet Mazrekaj.

Ambasadori i Mbretërisë së Bashkuar në Serbi, Edward Ferguson, ka potencuar se është e nevojshme që sa më shpejt të formohet Asociacioni i Komunave me Shumicë Serbe, meqë ky mekanizëm në vlerësimin e tij është pjesë e rëndësishme e dialogut dhe normalizimit të marrëdhënieve në mes të Kosovës dhe Serbisë.

“Asociacioni do të duhej të themelohej që vite më parë. Ne duam të shohim atë të formuar sa më shpejt që të jetë e mundur. Ne besojm se është një mekanizëm i rëndësishëm që duhet t’u japë besim komunitetit serb në Kosovë”, ka potencuar ambasadori.

Të njëjtën kërkesë gjatë kësaj jave parashtruan edhe Shtetet e Bashkuara të Amerikës, Franca e Gjermania. Presidenti i Francës, Emmanuel Macron, të martën, zhvilloi një bisedë telefonike me kryeministrin e Kosovës, Albin Kurti, me ç’rast është diskutuar anëtarësimi potencial i Kosovës në Këshillin e Evropës, njoftoi Zyra e Presidentit të Francës përmes një komunikate për media.

Macron gjatë bisedës ndërsa përshëndeti Kurtin për zbatimin e vendimit të Gjykatës Kushtetuese për Manastirin e Deçanit, nënvizoi rëndësinë që Franca i kushton zbatimit të Asociacionit, sidomos në kontekstin e anëtarësimit të Kosovës në Këshillin e Evropës.

Të martën pas Francës edhe Gjermania kërkoi që Kosova të bëjë një hap të prekshëm në raport me Asociacionin, kur në pyetje është anëtarësimi i Kosovës në Këshillin e Evropës.

Ambasadori i Gjermanisë në Kosovë, Jorn Rohde, potencoi se hap i prekshëm në këtë rast është dërgimi i draft-statutit të Asociacionit në Gjykatë Kushtetuese për shqyrtim. Mos ndërmarrja e asnjë hapi në këtë drejtim, sipas vlerësimit të Rohde, nuk është opsion i mirë.

Ndërkaq Ndihmës-sekretari amerikan i Shtetit për Evropë dhe Euroazi, James O’Brien kërkoi “përparim urgjent” në raport me këtë mekanizëm.

Ndërkaq NTV TELEVIZION ditë më parë raportoi se Qeveria e Kosovës është pajtuar në parim me komunitetin ndërkombëtar që pas përkrahjes që ka marrë me 16 prill nga Asambleja Parlamentare e Këshillit të Evropës për anëtarësimin e Kosovës në këtë organizatë, të dërgojë deri më 10 maj për shqyrtim në Gjykatën Kushtetuese draft-statutin për Asociacionin.

Ministri i Punëve të Jashtme të Greqisë Giorgos Gerapetritis, është distancuar nga raporti i Bakojanis dhe votimi pro Kosovës në Asamblenë Parlamentare të Këshillit të Evropës.

Greqia tanimë duket se e ka vendosur se do të abstenojë kur shtetet do të pyeten nëse janë dakord për anëtarësimin e Kosovës në Këshill të Evropës.

“Ashtu siç abstenuam nga procesi në të cilin u refuzua kërkesa e Kosovës për anëtarësim në këshillin e sigurisë, ashtu do të votojmë edhe në këshillin e ardhshëm të ministrave. Abstenimi konsiderohet refuzim” –tha ministri i Jashtëm grek.

Madje përfaqësuesi i qeverisë greke shkon edhe më tej kur thotë se Athina zyrtare nuk është dakord me integrimet e Kosovës.

I pyetur në lidhje me votimin pro Kosovës në asamblenë parlamentare të Greqisë, ministri i Jashtëm grek tha se “ajo që bëri çdo deputet është çështje pavarësie. Por qëndrimi i qeverisë është konsistent”.