Kosova, Serbia e Bosnja, Konference Ndërkombëtare për të treja

Analisti serb Dushan Janjic shprehet se Bosnja dhe Hercegovina është pika e nxehtë numër një në rajon. Ai beson se kur të përfundojnë zgjedhjet në Serbi, Kosovë, BE dhe SHBA, do të mbahet një konferencë ndërkombëtare, ku do të prezantohen të gjitha zgjidhjet e diskutuara dhe të pranuara deri më tani.

Duke thënë se lufta në Ukrainë e ngriti çmimin e konfliktit të Kosovës dhe Bosnjës, Dushan Janjiç, themelues i Forumit për Marrëdhënie Etnike në Serbi, tha se vlerësimet tregojnë qe skenari i muajit maj, kur demonstruesit sulmuan dhe plagosën 90 pjesëtarë të KFOR-it, aktualisht nuk mund të ndodhë, por askush nuk mund të garantojë që një gjë të tillë nuk do provokohet nga palë të tjera ose të treta.

Sipas tij, vlerësimet janë se Beogradi nuk do të dërgojë ushtrinë, policinë apo xhandarmërinë në veri të Kosovës dhe as nuk do të lejohet të kalojnë vijën administrative, e cila është një frikë që ka ekzistuar vitin e kaluar dhe se Beogradi nuk e dëshiron një skenar te tillë.

“Lista serbe në anën tjetër është e diskredituar dhe nuk mund ta mobilizojë popullin masivisht në këtë lloj aksioni” – u shpreh Janjiç, duke theksuar se vlerësimi është se nga ndonjë konflikt sado i vogël në Kosovë, ata që do të përfitonin më së shumti do ishin Putin dhe Rusia, për të demonstruar paaftësinë e NATO-s dhe Perëndimit për të kontrolluar një situatë kaq të vogël.

I pyetur nëse mund të kontrollohen konflikte të tilla të herëpashershme, Janjiq thotë se ato kontrollohen lehtësisht, por nuk ndalen.