Kosova të mos provokohet, Vuçiç trash zërin në publik

“Kryeministri i Kosovës Albin Kurti, duhet të ruajë qetësinë publike dhe nuk duhet të flasë aq lehtë për një luftë të mundshme kundër Serbisë, sepse një retorikë e tillë vetëm sa e shton tensionin e brendshëm në Kosovë, kur nuk ka arsye të supozohet se do të shpërthejë sërish lufta” – Keshtu u shpreh presidenti serb disa ditë më parë, kurse disa muaj më parë, gjatë një interviste për televizionin “Al Jazeera”, kryeministri i Kosovës pretendoi se sulmi i 24 shtatorit 2023 ndaj policisë së Kosovës nga serbë të armatosur në veri të vendit, ishte planifikuar nga presidenti serb Aleksandar Vucic në përpjekje për të “destabilizuar” Kosovën me shpresën e rifillimit të luftës.

Sipas analistëve, një deklaratë e tillë nuk i shërben interesit të publikut, dhe nuk prodhon përfitime politike apo strategjike për të. Jo vetëm kaq, por presidenti i Serbisë Aleksander Vucic nuk ka asgjë për të fituar duke nisur një luftë të re kundër Kosovës.Nëse do të ndodhte kjo, ai vetëm sa do të poshtërohej nga NATO, e cila është e përkushtuar ndaj sigurisë së shtetit të Kosovës.

Por teksa Vucic vazhdon të mbajë marrëdhënie shumë të ngushta me Vladimir Putinin, vlerëson shumë edhe marrëdhëniet e Serbisë me SHBA-në, dhe nuk do të ndërmerrte një veprim të tillë të pamatur. Siç edhe  deklaroi vetëm kohët e fundit: “Për ne është e një rëndësie të madhe që të mos prishet paqja në rajon dhe që Serbia do të vazhdojë të sillet me përgjegjshmëri dhe të kontribuojë në stabilitetin në Ballkan”.

Vucic theksoi se Serbia dhe SHBA-ja do të punojnë për të ruajtur marrëdhëniet dypalëshe dhe për më tepër, ai e di se në fund të fundit, aleanca e Serbisë me SHBA-në dhe Bashkimin Evropian, në vend të asaj me Rusinë, do t’i shërbejë më së miri interesave kombëtare afatgjata të Beogradit.

Sipas njohësve të sjelljes së presidentit serb, Vucic dëshiron të projektojë fuqi dhe një lidership të arsyeshëm për të forcuar pozitat e tij brenda vendit, duke i treguar njëkohësisht Perëndimit se ai është një udhëheqës i përgjegjshëm, që do të përpiqet gjithmonë të ruajë stabilitetin rajonal. Por ndërkohë i pëlqen jo pak të tregojë muskujt, pasi ka zhvendosur disa herë një pjesë të vogël të trupave serbe në kufi me Kosovës, lëvizje që janë cilësuar si armiqësore nga trupat e misionit të NATO-s në vend.

Një analizë mbi mjedisin e përgjithshëm politik dhe ushtarak të Ballkanit, sugjeron se asnjë vend në rajon nuk dëshiron që të rrisë tensionet, te cilat mund të përshkallëzohen edhe aksidentalisht në një konflikt të dhunshëm. Vendimi i NATO-s në fillim të tetorit 2023, për të dërguar 200 ushtarë britanikë dhe 130 ushtarë rumunë shtesë për të përforcuar misionin e saj paqeruajtës në Kosovë nuk është i parëndësishëm.

Vucic i kupton plotësisht rreziqet e mëdha që i kanosen atij dhe Serbisë, në rast se del jashtë linjës së përcaktuar nga Perëndimi. Qëllimi i shtimit të forcave të NATO-s në Kosovë, që po shoqërohet edhe me blerjen e dronëve dhe raketave antitank, kryesisht nga Turqia, është mbajtja nën kontroll e tensioneve në Ballkanin Perëndimor, siç e deklaroi Sekretari i Përgjithshëm i NATO-s, Jens Stoltenberg.

Po sipas analistëve, tani është koha që Albin Kurti të tregohet shumë i matur. Ndonëse kryeministri është i detyruar të garantojë sigurinë kombëtare të Kosovës, ai duhet gjithashtu ta shohë atë në kontekstin e përkushtimit të përgjithshëm të NATO-s për stabilitetin e Ballkanit, dhe se si mund të ndikojnë konfliktet e tjera në këtë stabilitet.

Për shumë këtë arsye, Kurti do të bëjë mirë ti marrë me rezerva ato që thotë apo bën presidenti serb. Vucic nuk është i interesuar të konfliktohet dhunshëm me Kosovën, pasi ai është jashtëzakonisht i vetëdijshëm se në këtë skenar humbjet e tij do të tejkalonin çdo lloj përfitimi.

Prandaj, deklarimi publik i Kurtit se Serbia po planifikon të nisë një luftë të re kundër Kosovës, nuk bën gjë tjetër veçse shkakton tension dhe stres të panevojshëm public dhe destabilizon ekonominë.

Veprime të tilla nxitin shpesh inflacionin, krijojnë shqetësime financiare dhe tensione sociale.  Në rast se paralajmërimi i Albin Kurtit  për një luftë të mundshme kundër Serbisë, nuk është bërë qëllimisht për të forcuar pozitën  e tij të brendshme, ai duhet ta dijë se Vucic vërtet flet vërtet me zë të lartë, por në dorë mban asgjë më shumë se një shkop të vogël.