Kosovë-Serbi/ Hill hedh kartat në tavolinë

“Marrëveshja e Brukselit ka të bëjë me Kosovën dhe jo me minoritetin shqiptar në Serbi” – ka thanë ambasadori i Shteteve të Bashkuara të Amerikës në Beograd, Christopher Hill, gjatë vizitës së tij në Luginën e Preshevës

Ai ka bërë të qartë se dialogu mes Kosovës dhe Serbisë ka të bëjë me zgjidhjen e problemeve mes tyre, e jo me ndonjë çështje tjetër, duke specifikuar shqiptarët që jetojnë në Serbi – dhe kështu hodhi poshtë reciprocitetin potencial të pakicave shqiptare në Serbi dhe asaj serbe në Kosovë.

“Duhet të jem shumë i qartë kur them se dialogu në Bruksel ka të bëjë me zgjidhjen e problemeve ndërmjet Prishtinës dhe Beogradit. Qëllimi i dialogut nuk është që të zgjidhen ndonjë çështje tjetër, çështjet e pakicave këtu apo në pjesët tjera të vendit”, ka thënë Hill.

Për më shumë, ambasadori amerikan ka thënë se çështja e minoritetit shqiptar në Serbi është ekskluzivisht çështje e shtetit të Serbisë dhe përsëriti se “nuk ka të bëjë fare me dialogun e Brukselit”.

Sipas tij, politika zyrtare e SHBA-së është të mbështesë dialogun e Brukselit dhe marrëveshjen e arritur, duke e shtuar si pjesë të rëndësishme edhe themelimin e Asociacionit të komunave me shumicë serbe.

I pyetur nga gazetarët për letrën e kongresmenëve amerikanë të cilët pas takimit me politikanë shqiptarë nga Bujanoci dhe Presheva, i kërkuan Sekretarit të Shtetit Amerikan Anthony Blinken që të formojnë një komunitet të komunave shqiptare, ambasadori tha se respekton atë që thonë kongresmenët, por një komunitet i tillë nuk është pjesë e Marrëveshjes së Brukselit.