Kurti dhe Vuçiç, tabela e re e qitjes së ministrave dhe shefave të BE

Emisari i Bashkimit Europian për dialogun Kosovë-Serbi, Miroslav Lajçak, pas takimit që pati me presidentin e Serbisë, Aleksandër Vuçiç, në Beograd bashkë me katër kolegët e tjerë të tij, tha se dialogu mes Kosovës dhe Serbisë do të jetë në agjendën e takimit të ministrave të jashtëm të shteteve anëtare të Unionit Europian ditën e hënë 23 tetor, si dhe njoftoi se për këtë do të diskutohet edhe nga liderët e BE-së më vonë gjatë javës në Këshillin Europian.

“Dy vizitat në Kosovë e Serbi, do të ndikojë drejtpërdrejt në agjendën e takimit të ministrave të jashtëm. Nuk ka të ardhme europiane as për Serbinë, as për Kosovën, pa normalizimin e marrëdhënieve mes tyre dhe zbatimin e marrëveshjeve të miratuara për normalizim, si ato aktuale ashtu edhe ato që janë dakorduar më herët. Gjithsesi gjatë ditëve në vazhdim, do kemi takime të tjera me Kurtin e Vucic” – deklaroi emisari Lajçak

Nga ana tjetër, pas takimin me BIG FIVE, Zyra për Media e qeverisë së Kosovës konfirmoi se pesë emisarët evropianë kishin propozuar tek kryeministri Albin kurti një plan të ri dhe sipas ketij të fundit, është e nevojshme që të ketë një reflektim cilësor dhe qasje të re, referuar bisedës për normalizimin e raporteve me Serbinë.

Kurse nga Beogradi, Presidenti i Serbisë, Aleksandër Vuçiç, është deklaruar pas takimit me pesë diplomatët se takimi ishte ‘i vështirë’ dhe se në Bruksel e presin “takime të rëndësishme” për të gjetur rrugëdalje nga kriza”

Kujtojmë se para takimit, në një prononcim për media, Vuçiç, i cili rëndom viktimizohet, iu tha gazetarëve, se me netë të tëra nuk ka mundur të flejë duke menduar takimin e 21 tetorit: “Nuk e di nëse do të bërtas apo do të qaj nga dhimbja, por do të kemi sukses që Serbinë të mos ia bëjmë dhuratë askujt, por ta bëjmë tonën”.