Kurti i quan “hajvanë” liderët e opozitës

Në një fjalim në sheshin “Skënderbeu” në Prishtinë, kandidati për kryeministër nga radhët e Lëvizjes Vetëvendosje, Albin Kurti, i ka quajtur “hajvanë” liderët e partive opozitare, për shkak të premtimeve të tyre gjatë fushatës zgjedhore.

“E keni parë çfarë rrenash prej premtimeve kanë dhënë, thanë se buxheti i shtetit do të bëhet më i madh se bruto produkti vendor, çfarë hajvanash, ose jepnin premtime për koeficient më shumë se në programin e tyre, çfarë hajvanash. Ka kaluar koha e hajvanatit, e kanë marrë vesh sonte”, tha ai.

Kurti, teksa ka shpallur fitoren në zgjedhjet e 9 shkurtit në sheshin “Skënderbeu”, para simpatizantëve të tij ka sulmuar edhe gazetarët duke thënë se kjo datë tregoi se populli e ka mundur edhe “Serbinë edhe Klan Serbinë”.

Sipas tij, rezultatet preliminare kanë treguar se LVV është fituese e zgjedhjeve.

“Rezultatet preliminare tregojnë diçka të qartë: Lëvizja Vetëvendosje është fituese e zgjedhjeve të 9 shkurtit 2025. Procesi zgjedhor ka qenë i lirë dhe i ndershëm, dhe falënderoj policinë për angazhimin e saj”.

Komisioni Qendror i Zgjedhjeve (KQZ), që nga mbyllja e qendrave të votimit ka pasur problem për të pasur qasje në rezultatet preliminare.

KQZ-ja ka deklaruar se janë duke u mbledhur të dhënat pas numërimit të fletëvotimeve nga vendvotimet.