Kurti më pragmatik dhe më pak i nxitur/ Jo nacionalizmit “me ne ose kundër nesh” 

Gazeta më e madhe dhe më prestigjioze britanike “The Guardian” ka dalë me një qëndrim editorial lidhur me zgjedhjet e 9 shkurtit dhe rezultatin që prodhuan ato. Duke marrë parasysh kontekstin e ri të gjeopolitikës, raportet e Kosovës me SHBA dhe sanksionet e BE-së, “The Guardian” sugjeron që Qeveria e re që mund të dalë nga një koalicion i mundshem, duhet të jetë më pragmatike dhe më bashkëpunuese.

Gazeta britanike ka përmendur gjithashtu edhe fushatën e partive kryesore të opozitës të cilat kanë përmendur si shqetësim rrezikun për izolimin e Kosovës dhe nevojën për përmirësimin e raporteve me aleatet.

“Nëse qeveri Kurti mund të lëvizë përtej retorikës ndonjëherë të ashpër nacionaliste dhe të rikthejë prane vetes Brukselin dhe Uashingtonin, kjo do të jetë jashtëzakonisht në interesin e Kosovës”, thuhet ne shkrimin editorial.

“The Guardian” shkruan gjithashtu edhe për nevojën e implementimit të Marrëveshjes së Normalizimit që është arritur në vitin 2023 dhe për një qasje të guximshme dhe bujare të BE-së në raport me Kosovën, si një shtet i vogël dhe i cenueshëm, që po përballet me një fqinj ngacmues e agresiv si Serbia.

Prestigjozja britanike flet për mundësinë e re që krijojnë emrat e rinj që janë vendosur në krye të institucioneve të BE-së, sikurse shefja e re e Politikës së Jashtme, Kaja Kallas dhe emisari Peter Sorensen. “Ata ofrojne mundësi për një fillim të ri por gjithashtu Qeveria e ardhshme e Kosovës duhet të jetë më pragmatike dhe më pak e nxitur nga nacionalizmi “ti je me ne ose kundër nesh” i Albin Kurti”, duke kërkuar gjithashtu nga Perëndimi që të bëjë më shumë për gjetjen e një zgjidhjeje.