Kurti, një CD e prishur që i ka ngecur shiriti/ ‘Porfil’ zbulon llafet prapa kuintave diplomatike

“Është në pikën më të vështirë të karrierës së tij”. Kështu vlerëson për Kryeministrin e Kosovës, Albin Kurti, gazeta e përjavshme liberale austriake “Profil” në një artikull kushtuar ngjarjeve të fundit në Veri. Aleatët më të rëndësishëm të Kosovës, thotë gazeta austriake, “janë çdo ditë e më të acaruar me Albin Kurtin” ndërsa shpjegon se në prapaskena diplomatike thuhen gjëra si “Kurti flet si një CD e prishur” me “shirit të ngecur” dhe shpesh e mbyll telefonin në momente kyçe në vend që të koordinohet me përfaqësuesit diplomatikë ose ushtarakë”, shkruan gazeta austriake.

Në shkrim thuhet se Albin Kurti po i bën shërbim të keq vetes dhe se është “I vetmuar” në përpjekjet e tij, e me të cilat “veçse po e izolon veten dhe Kosovën”.

Por, megjithatë, gazeta austriake ‘Profil’ tërheq vëmendjen edhe në atë se Shtetet e Bashkuara të Amerikës dhe Bashkimi Evropian “nuk duhet të bëjnë gabimet e kaluara” në rrëzimin e Albin Kurtit si në kohën e Donald Trump.

“Të aplikosh vetëm thumba ndaj Prishtinës, mund të ketë dy pasoja afatgjate e të rënda. Albin Kurti mund të radikalizohet, duke e kthyer popullatën me shumicë dërmuese pro-evropiane larg BE-së”, shkruan më tej gazeta.

Veç kësaj, duke shkruar edhe për shtimin e pranisë së 700 trupave shtesë të misionit paqeruajtës të NATO-s në Kosovës, gazeta austriake vlerëson se “kjo dëshmon se sa serioze është situata” .