Kush është ‘koka’ e barrikadave në veri të Kosovës

Zvonko Veselinoviç, u lind në Mitrovicë. Që në fillim të viteve 2000 është arrestuar disa herë për krime të ndryshme.

Raportimet flasin se ai ka bërë pasuri duke kontrabanduar karburante dhe se merret me biznese të ndryshme ilegale në këtë zonë të Kosovës. Në vitin 2011, gazeta prestigjioze amerikane New York Times do t’i kushtonte një shkrim të thelluar problemeve kontrabandës së veriut të Kosovës duke futur në filtër edhe Zvonko Veselinoviç.

Shkrimi tregonte se si Veselinoviç bashkëpunonte edhe me biznesmenë shqiptarë të Kosovës për kontrabandën në Veri ku përmendej shpërndarja e naftës.

“Por sipas një hetuesi, kur Veselinoviç duhej të fliste me kolegun kosovar, ata zakonisht takoheshin në një enklavë të pyllëzuar serbe. Ishte një zonë e izoluar pa telefon celular.”

Policia e Kosovës, diplomatët perëndimorë dhe autoritetet doganore kanë thënë ndër vite se Veselinoviç është praktikisht një mbret i punëve të pista.

Ai ishte organizator kryesor i një numri të madh barrikadash të ngritura në veri të Kosovës.

“Siç e dini disa anëtarë të thjeshtë të bandave janë futur nëpër listat e zeza të shteteve më të fuqishme demokratike në botë. Së fundmi edhe nga Britania e Madhe, pasi më herët ka qenë nga Gjermania dhe Departamenti Amerikan i Shtetit. Kjo të lë të kuptosh që faktori kryesor destabilizues në pjesën veriore janë bandat kriminale me në krye Veselinovic. Ndërsa ai e ka në krah të fortë në Serbi pasi që Vuçiç e ka përkrahur për ta mbajtur nën kontroll pjesën veriore të Kosovës”, u shpreh politologu, Abdullah Sadiku.

…

Nuk luhet vetëm politika! “Koka” të krimit të organizuar dhe kontrabandistë, kush janë strategët e barrikadave

Po kush e kontrollon veriun e Kosovës në të vërtetë dhe cilat janë interesat e errëta që luhen pas strategjisë së barrikadave…? E vërteta është se në Veri, nuk luhen vetëm interesa politike.

Veriu i Kosovës përbëhet nga katër komuna të cilat janë me shumicë serbe. Mitrovica e Veriut, Leposaviçi, Zubin Potoku dhe Zvecani kanë një popullsi prej rreth 48 mijë banorësh, 87% e të cilëve janë me kombësi serbe dhe 10% me kombësi shqiptare.

Këto katër komuna shtrihen në një sipërfaqe prej 1 mijë kilometrash katrorë. Në këtë hapësirë që shtyhet dhe tërhiqet nga Beogradi dhe Prishtina, lulëzon trafiku i paligjshëm, kontrabanda, kalimi i drogës dhe krimi i organizuar.

Emrat e përveçëm se kush kontrollon veriun e Kosovës nuk mungojnë. Ato na i thonë pothuajse të gjithë që ne takojmë dhe intervistojmë në Mitrovicë dhe Prishtinë. Ata janë Milan Radoiçiç dhe Zvonko Veselinoviç i njohur si biznesmen. Ky i fundit konsiderohet si truri i bllokadave në Veri. Ai është njeri me mjaft influencë në politikën e Beogradit.

“Dmth shumë veprime që janë marrë nga qeveria e Kosovës për me facilitu integrimin e komunitet serb, siç është amnistia ndaj obligimit për me pagu energjinë elektrike, janë shfrytëzuar prej grupeve kriminale. Dhe ky është një lloj sekreti jopublik se kush qëndron pas këtyre grupeve kriminale në Kosovë, dhe ai është Milan Radoicic, nënkryetar i listës Sërbska në Kosovë, i cili e ka një fletë-arresti nga policia e kosovës për rolin e tij në vrasjen e poltikanit serb Oliver Ivanovic.” u shpreh Shpat Balaj, Hulumtues/QKSS